ડિજિટલ મનોરંજનની દુનિયામાં કેટલીક સ્ટોરીઓ એવી હોય છે જે માત્ર જોવામાં નથી આવતી, પરંતુ જીવવામાં આવે છે. ધ વાયરલ ફીવર (TVF) આવી ઘણી સ્ટોરીઓનો જન્મદાતા છે. પંચાયત, ગુલ્લક અને એસ્પિરેન્ટ્સ સિવાય પણ મેકર્સે એવી ઘણી સિરીઝ આપી છે જે હૃદયને સ્પર્શી જાય તેવી છે. આવી જ એક સિરીઝ જે 7 વર્ષ પહેલાં રિલીઝ થઈ હતી અને તેને શાનદાર રેટિંગ મળ્યું છે. માત્ર 5 એપિસોડવાળી આ વેબ સિરીઝની હવે ત્રણ સીઝન આવી ચૂકી છે. અમે જે સિરીઝની વાત કરી રહ્યા છીએ તેનું નામ છે કોટા ફેક્ટરી. રાઘવ સુબ્બુના નિર્દેશનમાં બનેલી આ સિરીઝ માત્ર વિદ્યાર્થીઓમાં લોકપ્રિય નથી થઈ, પરંતુ તેણે પોપ કલ્ચર પર પણ પોતાની અમીટ છાપ છોડી છે. 2019માં શરૂ થયા પછી આ શોએ હવે સફળ 7 વર્ષ પૂર્ણ કર્યા છે.
સફળતાની દોડ અને બેરંગ જિંદગીની વાસ્તવિકતા
આ સિરીઝની સ્ટોરી રાજસ્થાનના એજ્યુકેશન હબ કોટા પર આધારિત છે, જ્યાં દર વર્ષે લાખો વિદ્યાર્થીઓ પોતાની આંખોમાં IITનું સપનું લઈને પહોંચે છે. સ્ટોરીનું કેન્દ્ર 16 વર્ષનો વૈભવ (મયૂર મોરે) છે, જે ઈટારસીથી કોટા આવે છે. અહીંથી વૈભવની એવી સફર શરૂ થાય છે જેમાં તેને માત્ર કઠિન સ્પર્ધાનો સામનો જ નથી કરવો પડતો, પરંતુ મિત્રતા, પ્રેમ અને પોતાની ઓળખ બનાવવાના સંઘર્ષમાંથી પણ પસાર થવું પડે છે. આ શો માત્ર JEE પરીક્ષાની તૈયારી વિશે નથી, પરંતુ તે એવા ભાવનાત્મક ઉતાર-ચઢાવની સ્ટોરી છે જે એક વિદ્યાર્થી પોતાના ઘરથી દૂર રહીને દબાણ વચ્ચે અનુભવે છે. અહીં દરેક દિવસ એક નવો પડકાર છે અને દરેક વળાંક પર એક નવો પાઠ છે.
કલાકારો અને તેમના યાદગાર પાત્રો
કોટા ફેક્ટરીની સફળતાનો મોટો શ્રેય તેની સચોટ સ્ટાર કાસ્ટને જાય છે. વૈભવના રૂપમાં મયૂર મોરેએ એક સરેરાશ વિદ્યાર્થીની બેચેનીને ખૂબ જ સુંદર રીતે રજૂ કરી છે. રંજન રાજ (મીના) અને આલમ ખાન (ઉદય) એ મિત્રતાના એ પાસાઓને જીવંત કર્યા છે જે કોટાની નીરસ જિંદગીમાં રંગ ભરવાનું કામ કરે છે. શોમાં રેવતી પિલ્લઈ, ઉર્વી સિંહ અને અહેસાસ ચન્નાએ પણ મહત્વની ભૂમિકાઓ ભજવી છે. પરંતુ આ સિરીઝનું સૌથી પ્રભાવશાળી અને લોકપ્રિય પાત્ર જીતુ ભૈયા (જિતેન્દ્ર કુમાર) નું છે. જીતુ ભૈયા માત્ર એક શિક્ષક નહીં પણ વિદ્યાર્થીઓના માર્ગદર્શક અને ફિલોસોફર બનીને ઉભર્યા છે, જેના સંવાદો આજે પણ યુવાનો માટે પ્રેરણાનો સ્ત્રોત છે.
બ્લેક-એન્ડ-વ્હાઇટ ફોર્મેટનો અનોખો પ્રયોગ
આ સિરીઝની સૌથી અનોખી બાબત તેની રજૂઆત (Presentaion) છે. આ ભારતની પ્રથમ બ્લેક-એન્ડ-વ્હાઇટ વેબ સિરીઝ છે. જોકે તેનું શૂટિંગ કલર્ડ કેમેરા પર થયું હતું, પરંતુ પોસ્ટ-પ્રોડક્શનમાં તેને મોનોક્રોમ (શ્વેત-શ્યામ) કરી દેવામાં આવી હતી. આ પાછળનો હેતુ કોટામાં કોચિંગ લાઈફની બેરંગ અને એકાકી પ્રકૃતિને દર્શાવવાનો હતો. આ ટેકનિક પ્રેક્ષકોને વિદ્યાર્થીઓના માનસિક દબાણ અને તેમના સંઘર્ષ સાથે સીધા જોડવામાં સફળ રહી છે. આ પ્રયોગ અને ટેકનિકલ શ્રેષ્ઠતાને કારણે શોને 2025ના IWM ડિજિટલ એવોર્ડ્સ અને IIFA ડિજિટલ એવોર્ડ્સમાં 'બેસ્ટ સ્ટોરી' અને મોસ્ટ પોપ્યુલર યુથ ડ્રામા જેવા સન્માન આપવામાં આવ્યા છે.
ક્યાં જોવી અને શું છે રેટિંગ?
કોટા ફેક્ટરીની તમામ સીઝન Netflix પર ઉપલબ્ધ છે (શરૂઆતની સીઝન TVF Play અને YouTube પર પણ જોઈ શકાતી હતી). રેટિંગની બાબતમાં પણ આ શો ટોચ પર છે. IMDb પર તેને 9/10નું શાનદાર રેટિંગ પ્રાપ્ત થયું છે, જે તેની ગુણવત્તા અને પ્રેક્ષકો સાથેના જોડાણને સાબિત કરે છે. TVF એ આ શો દ્વારા સાબિત કરી દીધું છે કે જો સ્ટોરી સાચી હોય તો તે કોઈ પણ રંગ (કે રંગ વગર પણ) લોકોના દિલ સુધી પહોંચી જ જાય છે.
આ પણ વાંચો- ન નરગિસ, ના મધુબાલા, ના હેમા માલિની! આ એક્ટ્રેસે જીત્યો હતો દેશનો પ્રથમ ઈન્ટરનેશનલ એવોર્ડ
