પવન કલ્યાણની ફિલ્મ ઉસ્તાદ ભગત સિંહને લઈને સોશિયલ મીડિયા પર ફરી એકવાર ચર્ચા જાગી છે. આ ફિલ્મ 2016ની તમિલ હિટ તેરીની સત્તાવાર રીમેક છે. ડાયરેક્ટર હરીશ શંકરની આ ફિલ્મ 19 માર્ચે સિનેમાઘરોમાં રિલીઝ થઈ હતી, પરંતુ તેને બોક્સ ઓફિસ પર આદિત્ય ધરની ફિલ્મ ધુરંધર: ધ રિવવેન્જ સામે ભારે ટક્કર મળી હતી. 150 કરોડના બજેટમાં બનેલી આ ફિલ્મે વિશ્વભરમાં માત્ર 95 કરોડનો બિઝનેસ કર્યો અને ફ્લોપ સાબિત થઈ. હવે આ ફિલ્મ OTT પ્લેટફોર્મ પર રિલીઝ થઈ છે અને ટોપ 6 માં ટ્રેન્ડ કરી રહી છે.
નેટફ્લિક્સ પર રિલીઝ અને દર્શકોની નારાજગી
ઉસ્તાદ ભગત સિંહ નેટફ્લિક્સ પર દસ્તક આપી ચૂકી છે, પરંતુ અહીં પણ તેને દર્શકોના ગુસ્સા અને ટ્રોલિંગનો સામનો કરવો પડી રહ્યો છે. નેટફ્લિક્સ ઈન્ડિયાએ જાહેરાત કરી કે 16 એપ્રિલથી આ ફિલ્મ તેલુગુ ઉપરાંત હિન્દી, તમિલ, કન્નડ અને મલયાલમ ભાષાઓમાં સ્ટ્રીમિંગ માટે ઉપલબ્ધ છે. જોકે, સ્ટ્રીમિંગ શરૂ થતાની સાથે જ સોશિયલ મીડિયા પર ફેન્સનો રોષ જોવા મળ્યો હતો.
સોશિયલ મીડિયા પર ભારે ટ્રોલિંગ
ફિલ્મ OTT પર આવતાની સાથે જ X અને ઇન્સ્ટાગ્રામ પર કટાક્ષભરી કોમેન્ટ્સનો પૂર આવ્યો છે. એક યુઝરે મજાક ઉડાવતા તેને ઓસ્કાર નોમિની અને 1 બિલિયન ડોલર કમાનારી ફિલ્મ ગણાવી, તો બીજાએ લખ્યું કે તે પવન કલ્યાણની બીજી ફ્લોપ ફિલ્મ અજ્ઞાતવાસી ચાર વાર જોઈ શકે છે, પણ ઉસ્તાદ ફરી જોવાની હિંમત નથી. કેટલાક લોકોએ તો ચેતવણી આપી કે ફિલ્મ તો આવી ગઈ છે પણ તેને જોવાવાળું કોઈ નથી.
મેકર્સની ટીકા અને નેટફ્લિક્સના ટ્રેલરના વખાણ
રસપ્રદ વાત એ છે કે, જ્યારે ફિલ્મની ટીકા થઈ રહી છે, ત્યારે નેટફ્લિક્સ દ્વારા એડિટ કરવામાં આવેલા નવા ટ્રેલરના વખાણ થઈ રહ્યા છે. ફેન્સે ડાયરેક્ટર હરીશ શંકર અને પ્રોડક્શન હાઉસ પર નિશાન સાધતા કહ્યું કે નેટફ્લિક્સનું એડિટિંગ ઓરિજિનલ ટ્રેલર કરતા ઘણું સારું અને એનર્જેટિક છે. કેટલાક લોકોએ તો એવો પણ સુઝાવ આપ્યો કે નેટફ્લિક્સે આખી ફિલ્મ ફરીથી એડિટ કરવી જોઈએ જેથી ઓછામાં ઓછું પરિવાર સાથે તે જોઈ શકાય.
ફિલ્મની સફર અને નિષ્ફળતા
આ ફિલ્મની સફર ઘણી ઉતાર-ચઢાવવાળી રહી છે. 2021માં આ ફિલ્મની જાહેરાત ભવદીયુડુ ભગત સિંહના નામે કરવામાં આવી હતી. વર્ષ 2012 ની બ્લોકબસ્ટર ફિલ્મ ગબ્બર સિંહ પછી હરીશ શંકર અને પવન કલ્યાણની જોડી પાસે ઘણી આશાઓ હતી. અનેક વિલંબ પછી ફિલ્મનું શૂટિંગ 2023 માં શરૂ થયું અને 2025 માં પૂરું થયું. પવન કલ્યાણ આંધ્રપ્રદેશના નાયબ મુખ્યમંત્રી બન્યા તે પહેલાં તેમણે સાઇન કરેલી આ છેલ્લી ફિલ્મોમાંની એક હતી. હાલના પ્રતિસાદ જોતા લાગે છે કે આ જોડી ગબ્બર સિંહ જેવો જાદુ ફરી ચલાવવામાં નિષ્ફળ રહી છે.
આ પણ વાંચો- Soundarya : મેડિકલનો અભ્યાસ અધૂરો મૂકી બની એક્ટ્રેસ, અમિતાભ બચ્ચન સાથે કર્યું કામ, થયું હતું દર્દનાક મોત!
