Amreliમાં 25 વર્ષીય યુવાન પર 3 હુમલાખોરોએ કર્યો જીવલેણ હુમલો

અમરેલીમાં છેલ્લા ઘણા સમયથી કાયદો વ્યવસ્થા કથળી રહી હોય તેમ જણાઈ રહ્યું છે. અગાઉ એક અનુસૂચિત યુવક સાથે મારામારી થઈ હતી. તો વધુ મારામારી અને હુમલાનો ચોંકાવનારો બનાવ અમરેલીના ચાપાથળ ગામમાંથી સામે આવ્યો છે. અમરેલીના ચાપાથળ ગામના 25 વર્ષીય યુવાન પર પાઈપ અને છરી વડે હુમલો કરવામાં આવ્યો હતો.જેના લીધે સમગ્ર પંથકમાં ચકચાર મચી જવા પામી હતી.

યુવક પર જીવલેણ હુમલો

સૂત્રો પાસેથી મળતી માહિતી મુજબ અમરેલીના ચાપાથળ ગામના 25 વર્ષિય યુવાન પર જીવલેણ હુમલો કરવામાં આવ્યો હતો.અમરેલીના ચાપાથળનો 25 વર્ષીય યુવાન ગભરુભાઈ મુંધવા ચાપાથળથી અમરેલી માર્કેટ યાર્ડમાં ખાણ લેવા માટે જઈ રહ્યો હતો,તે દરમિયાન યુવાન પર 3 લોકોએ પાઈપ અને છરી વડે હુમલો કરી દીધો હતો.તો યુવાનને ચક્કરગઢના પાટિયા પાસે 3 અજાણ્યા લોકોએ રોક્યો હતો.જે બાદ તેના પર હુમલો કર્યો હતો.

પોલીસે વધુ તપાસ કરી

ચક્કરગઢના પાટિયા પાસે 3 લોકોએ યુવકના માથા અને પડખાના ભાગે છરી મારી હતી, તેમજ પાઈપ વડે મુંઢમાર માર્યો હતો. જોકે, યુવક ભાગવામાં સફળ રહેતા તેનો જીવ બચી ગયો હતો. જ્યારે યુવકને તેના સગાઓ દ્વારા 108 મારફતે તાત્કાલિક ધોરણે અમરેલી હોસ્પિટલ ખાતે ખસેડવામાં આવ્યો હતો. જોકે, ઘટનાની જાણ થતા અમરેલી તાલુકા પોલીસ તાત્કાલિક ધોરણે હોસ્પિટલ દોડી આવી હતી.યુવકની ફરિયાદ નોંધીને અમરેલી તાલુકા પોલીસે વધુની તપાસ હાથ ધરી હતી.