ગાંધીનગરમાં ભૂમાફિયાઓની ગેંગ ઝડપાઈ, નકલી ડોક્યુમેન્ટ્સ બનાવી કરતા હતા જમીનોના દસ્તાવેજ

• ગાંધીનગર LCBની મોટી કાર્યવાહી
  
  
• બોગસ ડોક્યુમેન્ટ્સના આધારે કાવતરૂં કરતી ભૂમાફિયા ગેંગનો પર્દાફાશ
• પોલીસે 11 લોકોની અટકાયત કરી તપાસ હાથ ધરી

ગાંધીનગર એલસીબીએ બોગસ દસ્તાવેજોના આધારે જમીન પડાવી લેવાના કાવતરાખોર આરોપીઓનો ખુલાસો કર્યો છે અને તેમને ઝડપી પાડ્યા છે. આ મામલે એલસીબીએ ચાર મહિલા સહિત 11 આરોપીઓને દસ્તાવેજ કરતા પહેલા જ ઝડપી પાડ્યા છે. આરોપીઓની પૂછપરછમાં અનેક ચોંકાવનારી વિગતો સામે આવી છે.

આ મામલે વધુ જાણકારી પ્રમાણે ગાંધીનગર એલસીબીની ટીમે બોગસ ડોક્યુમેન્ટના આધારે કરોડો રૂપિયાની જમીન પડાવવાનું કાવતરૂં કરતી ભૂ માફિયા ગેંગને ઝડપી લીધી છે. આ મામલે પોલીસે કાર્યવાહીમાં 4 મહિલાઓની સાથે 11 આરોપીઓને ઝડપીને અટકાયત કરી છે. પોલીસે જીતુ ગોસ્વામી નામના શખ્સ સહિત 11 આરોપીઓને ઝડપી પાડી બોગસ ડોક્યુમેન્ટ તથા મોબાઈલ કબ્જે કરી લીધા છે. આરોપીઓ ખોરજની 5144 ચોમી ખેતીની જમીનનો બારોબાર ખોટા ડોક્યુમેન્ટના આધારે દસ્તાવેજ કરવાની ફિરાકમાં હતા. જો કે આ શખ્સોની કારી ફાવે તે પહેલા જ ગાંધીનગર એલસીબીએ તેમને ઝડપી પાડ્યા છે.

માહિતી પ્રમાણે આ આરોપીઓની મોડસ ઓપરેન્ડી એવી હતી કે એ અસલ ખેડૂતોના નામે બોગસ ડોક્યુમેન્ટ બનાવી છેંતરપિંડી આચરતા હતા. આ કૌભાંડનો મુખ્ય સૂત્રધાર જીતુ ગોસ્વામી જમીન ખરીદનાર પાર્ટીને શોધી લાવતો હતો. જીતુ ગોસ્વામીના સાગરિતો મુકેશ પટેલ ખોટા આધાર કાર્ડ અને પાન કાર્ડ બનાવતા હતા. ગૌતમ સેનમા તથા રાજપાલસિંહ સોઢા અસલ ખેડૂતોની ઉંમરના ખોટા ખેડૂત તથા મહિલાઓને શોધી લાવતા હતા અને પછી ખોટા ડોક્યુમેન્ટના આધારે દસ્તાવેજની કામગીરીને અંજામ આપવામાં આવતો હતો.

મહત્વનું છે કે આ આરોપીઓ વિરુદ્ધ અગાઉ પણ ગુના નોંધાયા છે. મુખ્ય સુત્રધાર જીતુ ગોસ્વામી વિરૂદ્ધ અમદાવાદમાં દુષ્કર્મ સહિત બે પોલીસ મથકમાં ગુના નોંધાયા છે. જો કે મુકેશ પટેલ સામે બે ગુના જ્યારે ગૌતમ સેનમા વિરૂદ્ધ 9 ગુના નોંધાયા છે. પોલીસ આ આરોપીઓ સામે વધુ તપાસ કરી રહી છે. આરોપીઓ પાસેથી રકમના ચેક સહિતના દસ્તાવેજ મળી આવ્યા છે જેની પણ પોલીસ તપાસ કરી રહી છે. આ મામલે વધુ જાણકારી હવે પોલીસ તપાસ પછી જ બહાર આવી શકે તેમ છે.