Deesaની ઘટના બાદ ગાંધીનગરનું તંત્ર જાગ્યુ, ફટાકડાના 19 સ્થળ પર બોલાવી તવાઈ

બનાસકાંઠાના ડીસાની ઘટના બાદ ગાંધીનગરનું તંત્ર સફાળું જાગી ઉઠ્યું છે અને રાજ્યભરમાં તપાસ કરવામાં આવી રહી છે, ત્યારે ગાંધીનગર જિલ્લામાં ફટાકડાના 19 સ્થળ ભયજનક હોવાનું સામે આવ્યું છે. લાયસન્સ વગર અને રિન્યુ કરાવ્યા વગરના એકમોમાં તપાસ હાથ ધરવામાં આવી છે. દહેગામ તાલુકામાં 6 અને કલોલમાં 11 એકમોમાં તપાસ હાથ ધરવામાં આવી છે. આ સિવાય માણસા અને ગાંધીનગરમાં એક-એક એકમમાં તપાસ હાથ ધરવામાં આવી છે. તંત્રએ તપાસ કરી તમામ એકમો હાલમાં બંધ કરાવ્યા છે.

ડીસા બ્લાસ્ટ કેસના આરોપીનું ભાજપ સાથે કનેક્શન

ડીસામાં ગેરકાયદેસર રીતે ચાલતી ફટાકડા ફેક્ટરીમાં બ્લાસ્ટ થતાં 21 વ્યક્તિઓના મોત નીપજ્યા છે. ત્યારે ફેક્ટરીના માલિક દિપક મોહનાનીનું ભાજપ સાથેનું કનેક્શન બહાર આવ્યું છે. દીપક મોહનાની ડીસા શહેર ભાજપ યુવા મોરચામાં મંત્રી પદે રહી ચૂક્યો છે. હાલમાં પણ તે ભાજપનો પ્રાથમિક સભ્ય છે. ડીસા બ્લાસ્ટ કેસનો મુખ્ય આરોપી દીપક ખૂબચંદ મોહનાની વર્ષ 2014થી 2017 સુધી ડીસા શહેર યુવા ભાજપ સંગઠનમાં મંત્રી પદે રહી ચૂક્યો છે. દીપકની ફેક્ટરી ગોડાઉનનું લાઈસન્સ રીન્યુ કરવા બાબતે તેમજ થોડા સમય પહેલા જ ગોડાઉનની તપાસ કરવા ગયેલી તંત્રની ટીમને પણ કોઈ ભાજપના નેતાએ દબાણ કર્યું હોવાના આક્ષેપો થઈ રહ્યા છે. ત્યારે જ દીપકનું ભાજપ સાથેનું કનેક્શન નીકળતા અધિકારીઓને દબાવનાર આ નેતા કોણ તેવો સવાલ પણ ચારે બાજુ ચર્ચાઈ રહ્યો છે.