Ahmedabad: શહેરમાં ગરમીથી રોગચાળો વકર્યો, સોલા સિવિલની ઓપીડી 2100ને પાર પહોંચી

અમદાવાદમાં સતત વધી રહેલી ગરમીને કારણે રોગચાળો વકર્યો છે. છેલ્લા 10 દિવસમાં ઋતુગત બિમારીના 152 કેસ નોંધાયા છે. સોલા સિવિલમાં ઓપીડીમાં કેસનો આંકડો 2100ને પાર કરી ગયો છે. સોલા સિવિલમાં વાયરલ ઈન્ફેક્શનના 120 કેસ નોંધાયા છે. આ ઉપરાંત ઝાડા ઉલ્ટીના 36 દર્દીઓ અને ડેન્ગ્યૂના 12 દર્દીઓને દાખલ કરવાની ફરજ પડી છે. સોલા સિવિલમાં કમળાના 30 અને હિટ સ્ટ્રોકના રોજના 10 કેસ નોંધાઈ રહ્યાં છે. શહેરમાં વાતાવરણમાં બદલાવ આવતાં ઋતુગત બીમારીમાં વધારો થયો છે.

વાયરલ ઈન્ફેક્શન અને ઝાડા ઉલ્ટીના કેસોમાં વધારો

શહેરમા ગરમી વધતાં વાયરલ ઈન્ફેક્શન અને ઝાડા ઉલ્ટીના કેસોમાં વધારો થયો છે. 108 ઈમર્જન્સી એમ્બ્યુલન્સના આંકડા પ્રમાણે શહેરમાં 108ને 12થી 21 મે સુધીમાં 152 કોલ મળ્યા હતાં. જેમાં સૌથી વધુ કેસ તાવ તેમજ 10 કેસ ડાયેરિયાના હતાં. આ ઉપરાંત શહેરમાં પાણી અને મચ્છરજન્ય રોગચાળાએ પણ માથું ઉંચક્યું છે. પેટમાં દુખાવો, ડિહાઇડ્રેશન અને ગરમીને લીધે નબળાઈ જેવી તકલીફો લોકોમાં જોવા મળી છે.

ઋુતુગત બીમારી સહિત કોરોનાએ પણ માથું ઊંચક્યું

શહેરમાં ઋુતુગત બીમારી સહિત કોરોનાએ પણ માથું ઊંચક્યું છે. શહેરમાં છેલ્લા 24 કલાકમાં કોરોનાના નવા 20 કેસ નોંધાયા છે.શહેરમાં ચાલુ મહિનામાં જ 39 કેસ સામે આવ્યાં છે. જેમાં 8 લોકોને હોસ્પિટલમાંથી ડિસ્ચાર્જ આપવામાં આવ્યું છે.જ્યારે 31 કેસ એક્ટિવ છે.શહેરમાં સૌથી વધુ 10 કેસ ઉત્તર પશ્ચિમ ઝોનમાં નોંધાયા છે. જ્યારે સૌથી ઓછા 01 કેસ મધ્ય ઝોનમાં નોંધાયો છે.