સુરતમાં જૂની બોમ્બે માર્કેટમાં લાગી ભીષણ આગ

• સવારે 9 વાગે આગ ભભૂકી ઉઠતા અફરા તફરીનો માહોલ
  
• ફાયર બ્રિગેડની 6 ગાડીઓ ઘટના સ્થળ પર
• માર્કેટમાં 500 જેટલી દુકાનો આવેલી છે

સુરતની જૂની બોમ્બે માર્કેટમાં આગ ભીષણ આગની ઘટના સામે આવી છે. જેમાં માર્કેટની અંદર આવેલી 3 દુકાનોમાં આગ લાગવાથી અફરાતફરીનો માહોલ સર્જાયો છે. આગ લાગવાની સાથે જ ફાયર બ્રિગેડની 6 ગાડીઓ ઘટના સ્થળે પહોંચી ગઈ છે.

આ અંગેની માહિતી અનુસાર આજે સવારે 9 વાગ્યાની આસપાસ સુરતમાં આવેલા જૂની બોમ્બ માર્કેટમાં આગ લાગી હતી અને આગ લાગતાં જ તાત્કાલિક માર્કેટ ખાલી કરાવવામાં આવ્યું હતું. જો કે આગ લાગવાનું કારણ અકબંધ છે. તેમજ આગમાં કોઇ વ્યક્તિઓ ફસાયા હોવાની જાણકારી મળી નથી.

સુરતના સહરા દરવાજા સ્થિત જૂના બોમ્બે માર્કેટની 3 જેટલી દુકાનોમાં આગ લાગી હોવાની પ્રાથમિક માહિતી સામે આવી રહી છે. જેમાં આગ એટલી ભીષણ હતી કે દૂર દૂર સુધી આગના ધૂમાડાના ગોટેગોટા દેખાયા રહ્યા છે. જો કે આગ પર કાબૂ મેળવવાની કાર્યવાહી હાથ ધરવામાં આવી છે.

નોંધનીય છે કે, સુરતના જૂની બોમ્બે માર્કેટમાં કાપડની દુકાનમાં આગ લાગી છે. આ માર્કેટમાં 500 જેટલી દુકાનો આવેલી છે. જેના પગલે વેપારીઓમાં ભયનો માહોલ ફેલાયો છે. ઘટનાની જાણ થતા જ ફાયર ફાયટરની ટીમ ઘટનાસ્થળે પહોંચી ગઇ છે અને આગ પર કાબુ મેળવવા પ્રયત્નો કરી રહ્યા છે.