Suratમાં કોંગ્રેસના યુવા નેતા નુરું ચાઈનીઝ સામે ખંડણીનો એક વધુ ગુનો નોંધાયો

સુરતમાં કોંગ્રેસના યુવા નેતા વિરુદ્ધ વધુ એક ફરિયાદ નોંધાવામાં આવી છે. નુરું ચાઈનીઝ સામે વધુ એક ખંડણીનો ગુનો નોંધાયો છે. શહેરના રિંગરોડ પર ટેક્ષટાઈલ માર્કેટમાં SMCના પાર્કિંગને લઈને કોન્ટ્રાક્ટર પાસે ખંડણી માગી હતી. યુવાનને ચપ્પુ બતાવી પૈસાની ઉઘરાણી આ કોંગ્રેસનો યુવા નેતા કરતો હતો અને પૈસા નહીં આપે તો જાનથી મારી નાખવાની ધમકી પણ આ ખંડણીખોરે આપી હતી. ત્યારે હાલમાં સલાબતપુરા પોલીસે આ મામલે વધુ તપાસ હાથ ધરી છે.

વેપારીને ધમકી આપીને 10 લાખની ખંડણી માગવામાં આવી હતી

ઉલ્લેખનીય છે કે અગાઉ પણ સુરતના સલાબતપુરા વિસ્તારમાં ખંડણીખોરીની એક ગંભીર ઘટના સામે આવી હતી, જેમાં બિલ્ડિંગ બાંધકામના નામે વેપારીને ધમકી આપીને રૂપિયા 10 લાખની લાંચ માગવામાં આવી હતી. પોલીસે કાર્યવાહી કરતાં બે આરોપી નૂર શેખ અને સાદિક અલીને પકડી પાડ્યા હતા. આરોપી નૂર શેખે ફરિયાદી પાસે બાંધકામ ન તોડવા માટે 10 લાખની માગ કરી હતી અને પૈસા ન આપવા પર બાંધકામ તોડી નાખવાની ખુલ્લી ધમકી આપી હતી. જેમાં એક ખંડણી ખોર સુરત શહેરના કોંગ્રેસ લઘુમતી મોર્ચાના યુથ પ્રમુખ હોવાનું બહાર આવ્યું હતું.

પોલીસે રંગે હાથ પૈસા લેતા ઝડપી લીધો

સુરતના ફરિયાદી પાસે બાંધકામની સંપૂર્ણ પરમિશન હોવા છતાં આરોપી નૂર શેખ સતત દબાણ કરીને મોટી રકમ માગતો હતો. આ ઉપરાંત આરોપીએ ખોટી ખોટી અરજીઓ કરીને ફરિયાદીને વેપાર કરવા નહીં દઈએ એવી ધમકીઓ આપી હતી અને વધુમાં રૂપિયા 2 લાખની ખંડણી માગણી પણ કરી હતી. આ સાથે દર મહિને રૂપિયા 50 હજારનો હપ્તો ભરવાની શરત પણ ફરિયાદી સામે રાખી હતી. ફરિયાદીને આરોપી વારંવાર ગાળાગાળી કરી અને જાનથી મારી નાખવાની પણ ચીમકી ઉચ્ચારી હતી. આખરે આરોપી સાદિક અલીને રૂપિયા 50 હજાર આપવાના લેણદેણ સમયે પોલીસે રંગે હાથે ઝડપી લીધો હતો. ત્યારબાદ પોલીસે મુખ્ય આરોપી નૂર શેખની પણ ધરપકડ કરી લીધી હતી. હાલમાં સલાબતપુરા પોલીસ સ્ટેશનની ટીમે બંને આરોપીઓની ધરપકડ કરીને આગળની કાર્યવાહી શરૂ કરી છે.