Kheda: માતરમાં જૂથ અથડામણ, પંચાયતની જમીન પર લગ્નમંડપ બાંધવાને લઈ બબાલ

ખેડાના માતરનું ઊંઢેલા ગામ ફરી એકવાર વિવાદમાં આવ્યું છે. ઊંઢેલા ગામમાં જૂથ અથડામણ થયું છે. ઊંઢેલાના સરપંચ ઈન્દ્રવદન પટેલની દાદાગીરીથી બે જૂથ વચ્ચે અથડામણ થયું છે. પંચાયતની જમીન પર લગ્નમંડપ બાંધવાને લઈને બબાલ થઈ છે. 'અમારા પાણીના જગ લેવા હોય તો જ ગ્રામ પંચાયતની જમીનમાં લગ્નમંડપ બાંધવા દઈએ' તેવું કહેતા વિવાદ સર્જાયો છે.

ફરિયાદીએ લગ્નપ્રસંગ માટે પંચાયતની જમીન લીધી હતી

8 દિવસ પહેલા ફરિયાદીએ ભત્રીજીના લગ્નમાં જમણવાર માટે ગ્રામ પંચાયતની જમીન વાપરવા પરવાનગી લીધી હતી, જો કે લગ્નના આગલા દિવસે ગ્રામ પંચાયતની જગ્યા પર ફેન્સીંગના તાર હટાવી સાફ-સફાઈ કરવા પહોંચ્યા ત્યારે સરપંચે કોલ કરીને કહ્યું કે 'જો પાણીના જગ મારા લેવાના હોય તો જ મંડપ બાંધજે નહીં તો બાંધતો નહીં' ત્યારબાદ ફરિયાદી ડેલીગેટ તેમજ ઉપસરપંચ પાસે જતા તેઓએ જગ્યા પરથી ફેન્સીંગ હટાવી આપી હતી.

સરપંચે 6 લોકો સામે નોંધાવી ફરિયાદ

ત્યારબાદ સરપંચ અને તેમના પુત્રએ જગ્યા પર પહોંચી "અમને પૂછ્યા વગર જગ્યા ખોલી જ કેમ" કહી ગાળો બોલી મારામારી કરી હતી. આ સમગ્ર મામલે સરપંચ અને તેના પુત્ર વિરુદ્ધ માતર પોલીસ સ્ટેશનમાં ફરિયાદ દાખલ કરવામાં આવી છે તો બીજી તરફ સામે સરપંચે 6 લોકો વિરુદ્ધ મારામારી કરવા મામલે માતર પોલીસ મથકમાં ફરિયાદ નોંધાવી છે.