Ahmedabad News: વિરમગામ નગરપાલિકાની ડ્રેનેજ સમિતિના ચેરમેને આપ્યું રાજીનામું, જાણો શું છે કારણ?

અમદાવાદ ગ્રામ્ય વિસ્તારના વિરમગામમાંથી એક મોટા રાજકીય સમાચાર સામે આવી રહ્યા છે. વિરમગામ નગરપાલિકાના ડ્રેનેજ સમિતિના ચેરમેન સુરેશભાઈ જગદીશભાઈ દલવાડીએ અચાનક જ પોતાના ચેરમેન પદેથી રાજીનામું ધરી દેતા સ્થાનિક રાજકારણમાં ગરમાવો આવી ગયો છે. ભાજપના શાસનવાળી આ નગરપાલિકામાં ચેરમેનના રાજીનામાને લઈને ચર્ચાઓનો દોર શરૂ થઈ ગયો છે.

સામાન્ય સભામાં થઈ હતી નિમણૂંક, ટૂંકા ગાળામાં જ પદ છોડ્યું

મળતી માહિતી અનુસાર, વિરમગામ નગરપાલિકાના વોર્ડ નંબર-3 ના ચૂંટાયેલા સદસ્ય અને ભારતીય જનતા પાર્ટીના સનિષ્ઠ કાર્યકર સુરેશભાઈ દલવાડીને નગરપાલિકાની સામાન્ય સભા દરમિયાન ડ્રેનેજ સમિતિના ચેરમેન જેવી મહત્વની જવાબદારી સોંપવામાં આવી હતી. જોકે, આ નિમણૂંકના ટૂંકા ગાળામાં જ તેમણે પદ પરથી સ્વેચ્છાએ નિકળી જવાનો નિર્ણય કર્યો છે.

રાજીનામા પાછળ બીમારીનું કારણ આગળ ધરાયું

સુરેશભાઈ દલવાડીના આ અચાનક રાજીનામા પાછળ કોઈ રાજકીય નારાજગી છે કે, અન્ય કોઈ કારણ, તે અંગે અટકળો ચાલી રહી હતી. જોકે, તેમણે આપેલા રાજીનામા પત્રમાં સ્પષ્ટ ઉલ્લેખ કર્યો છે કે, તેઓ થોડા સમયથી બીમારીનો સામનો કરી રહ્યા છે. બીમારીના કારણે તેઓ આ મહત્વની જવાબદારી અને ફરજ પૂરતી નિષ્ઠાથી નિભાવી શકે તેમ ન હોવાથી તેમણે સ્વેચ્છાએ ડ્રેનેજ સમિતિના ચેરમેન પદેથી રાજીનામું આપ્યું છે.

આ પણ વાંચો - Ahmedabad: વિરમગામ-સુરેન્દ્રનગર હાઈવે પર ત્રિપલ અકસ્માતમાં એકનું મોત, બાળક સહિત 3 ઘાયલ થયા