સાંજ પડે અને રસ્તા પર શાંતિ ફેલાય, ત્યારે અચાનક ભસવાનો અવાજ મનમાં ડર ઉભો કરે છે. એક સમયે મિત્ર ગણાતા શ્વાનો, આજે અનેક પરિવારો માટે ભયનું કારણ બની રહ્યા છે. કોઈ કામે નીકળે, બાળક સ્કૂલે જાય કે વૃદ્ધ સવારની ચાલવા જાય—રખડતા શ્વાનોના હુમલાનો ખતરો હંમેશા રહેતો હોય છે.
દેવભૂમિ દ્વારકામાં રખડતા શ્વાનોનો વધતો આતંક
દેવભૂમિ દ્વારકા જિલ્લામાં રખડતા શ્વાનોના હુમલાના બનાવોએ ચિંતાજનક સ્થિતિ સર્જી છે. ખાસ કરીને સલાયા શહેરમાં એક જ દિવસમાં 8 લોકો પર શ્વાનએ હુમલો કર્યો હોવાની ઘટના સામે આવી છે. નાના બાળકો થી લઈને વૃદ્ધો સુધી કોઈ પણ સુરક્ષિત નથી. આ ઘટનાએ સમગ્ર વિસ્તારમાં ભયનો માહોલ ઉભો કર્યો છે.
સ્થાનિક માહિતી મુજબ
સ્થાનિક માહિતી મુજબ, છેલ્લા દોઢ મહિનામાં 97 લોકો શ્વાનના બચકાનો ભોગ બન્યા છે. રસ્તા, ગલીઓ અને રહેણાંક વિસ્તારોમાં રખડતા શ્વાનોની સંખ્યા વધી રહી છે, પરંતુ નિયંત્રણ માટે પૂરતા પગલાં લેવાતા ન હોવાનું લોકો જણાવી રહ્યા છે. અનેક વખત ફરિયાદો છતાં સમસ્યા યથાવત છે.
લોકોમાં ભય અને રોજિંદી મુશ્કેલી
રખડતા શ્વાનના આતંકથી લોકો ત્રાહિમામ પોકારી રહ્યા છે. માતા-પિતા બાળકોને એકલા બહાર મોકલતા ડરે છે. વડીલોને સવાર-સાંજ ચાલવા જવું મુશ્કેલ બન્યું છે. ઘણા કિસ્સાઓમાં લોકોને હોસ્પિટલમાં સારવાર લેવી પડી છે, જેનાથી માનસિક અને આર્થિક બોજ પણ વધ્યો છે.
કૂતરાના કરડવાથી થતો ખતરનાક રોગ: રેબિઝ (Rabies)
શ્વાનના કરડવાથી થતો ગંભીર અને જીવલેણ રોગ રેબિઝ (Rabies) છે. આ વાયરસ શ્વાનની લાળ દ્વારા માણસના શરીરમાં પ્રવેશે છે. સમયસર રસી ન લેવાય તો રેબિઝ જીવલેણ સાબિત થઈ શકે છે. તેથી શ્વાનના કરડ્યા બાદ તરત જ ઘા સાફ કરી નજીકની હોસ્પિટલમાં એન્ટી-રેબિઝ રસી લેવી અત્યંત જરૂરી છે.
આ પણ વાંચો : Gujarat Budget 2026: રાજકોટ જિલ્લા પંચાયતનું 1193.68 કરોડનું બજેટ અંદાજપત્ર રજૂ, વિકાસ પર વિશેષ ભાર
