દેવભૂમિ દ્વારકા જિલ્લાના જામ ખંભાળિયા-જામનગર હાઇવે પરથી એક ચોંકાવનારા અને ભયાનક અકસ્માતના સમાચાર સામે આવ્યા છે. હાઇવે પર આવેલા દાંતા ગામ નજીકથી પસાર થઈ રહેલી એક લક્ઝુરિયસ કારમાં અચાનક જ ભીષણ આગ ફાટી નીકળી હતી. જોતજોતામાં આગની જ્વાળાઓ એટલી વિકરાળ બની ગઈ હતી કે આખી કાર હાઇવેની અધવચ્ચે જ ભડભડ સળગી ઉઠી હતી અને સંપૂર્ણપણે બળીને ખાખ થઈ ગઈ હતી.
ફાયર બ્રિગેડની ટીમે આગ પર કાબૂ મેળવ્યો
કારમાંથી અચાનક ધુમાડા નીકળતા જ ચાલકે સમયસૂચકતા વાપરી ગાડી રોડ સાઇડ ઊભી રાખી દીધી હતી. આ ઘટનાને પગલે હાઇવે પરથી પસાર થતા વાહનચાલકો રોકાઈ ગયા હતા. જોતજોતામાં લોકોના મોટા ટોળા એકઠા થઈ ગયા હતા. સ્થાનિકો દ્વારા તાત્કાલિક જામ ખંભાળિયા ફાયર બ્રિગેડને આ અંગે જાણ કરવામાં આવી હતી. ફાયર ફાઇટરોની ટીમ ઘટનાસ્થળે દોડી આવી હતી અને પાણીનો મારો ચલાવી ભારે જહેમત બાદ આગ પર સંપૂર્ણ કાબૂ મેળવ્યો હતો.
