રાજકોટના જેતપુરમાંથી બાળમજૂરીના દૂષણ સામે સરકારી તંત્ર દ્વારા સરાહનીય કાર્યવાહી કરવામાં આવી છે. જેતપુરના શ્રમ અને રોજગાર વિભાગની ટીમને ચોક્કસ બાતમી મળી હતી કે સ્થાનિક કારખાનાઓમાં માસૂમ બાળકો પાસે મજૂરી કરાવવામાં આવી રહી છે. આ બાતમીના આધારે શ્રમ વિભાગની ટીમે સ્થાનિક પોલીસને સાથે રાખીને જેતપુરના ચાંપરાજપુર રોડ પર આવેલા કારખાનાઓ પર ઓચિંતા દરોડા પાડ્યા હતા. આ કડક સર્ચ ઓપરેશન દરમિયાન અલગ-અલગ બે એકમોમાંથી કુલ 24 જેટલા બાળમજૂરોને બંધનમુક્ત કરાવવામાં તંત્રને મોટી સફળતા મળી છે.
બે અલગ-અલગ યુનિટમાંથી બાળકો ઝડપાયા
અધિકારીઓ દ્વારા કરવામાં આવેલી આ તપાસમાં ચાંપરાજપુર રોડ પર આવેલા 'જય ગણેશ ફોલ્ડિંગ વર્ક્સ' નામના કારખાનામાં મોટા પાયે બાળમજૂરી થતી હોવાનું સામે આવ્યું હતું. તંત્રની ટીમે આ મિલના 'યુનિટ 1' માંથી 16 માસૂમ અને તેની જ બાજુમાં આવેલા 'યુનિટ 2' માંથી અન્ય 8 બાળકો મળી આવ્યા હતા. બંને યુનિટોમાંથી થઈને કુલ 24 જેટલા બાળકોને કારખાનાના જોખમી વાતાવરણ અને આકરી મજૂરીમાંથી ઉગારી લેવામાં આવ્યા હતા.
