ખેડા જિલ્લાના ઠાસરા તાલુકામાંથી એક અત્યંત હૃદયકંપાવનારી અને ગમખ્વાર અકસ્માતની ઘટના સામે આવી છે. ઠાસરાના કાલસર-આગરવા રોડ પરથી પસાર થઈ રહેલું એક લાકડા ભરેલું ટ્રેક્ટર અચાનક ચાલકે નિયંત્રણ ગુમાવતા બેકાબૂ બન્યું હતું. કેનાલ રોડ પર ટ્રેક્ટર પરથી કાબૂ ગુમાવવાને કારણે આખું ટ્રેક્ટર રોડની સાઈડમાં આવેલી ઊંડી કેનાલમાં પલટી મારી ગયું હતું. આ ભયાનક અકસ્માતમાં ટ્રેક્ટર નીચે દબાઈ જવાને કારણે અને કેનાલના પાણીમાં ડૂબી જવાને કારણે ૨ વ્યક્તિઓના ઘટનાસ્થળે જ કમકમાટીભર્યા મોત નીપજ્યા હતા.
સ્થાનિક ગ્રામજનોએ કેનાલમાંથી મૃતદેહો બહાર કાઢ્યા
અકસ્માત એટલો જોરદાર હતો કે તેનો અવાજ સાંભળીને આસપાસના ખેતરોમાં કામ કરતા અને માર્ગ પરથી પસાર થતા સ્થાનિક ગામલોકો તાત્કાલિક ઘટનાસ્થળે દોડી આવ્યા હતા. કેનાલમાં ટ્રેક્ટર પલટી ગયેલું જોઈને સ્થાનિક યુવાનોએ તાત્કાલિક બચાવ કામગીરી શરૂ કરી હતી. જો કે, અકસ્માત ખૂબ ગંભીર હોવાથી બંને વ્યક્તિઓ અંદર ફસાઈ ગયા હતા. સ્થાનિકોએ ભારે જહેમત અને કલાકોની જહેમત બાદ કેનાલના પાણીમાંથી બંને મૃતકોના મૃતદેહ બહાર કાઢવામાં સફળતા મેળવી હતી.
