નડિયાદ શહેરમાં વહેલી સવારથી શરૂ થયેલા ભારે વરસાદના કારણે સમગ્ર શહેર જળબંબાકાર થઈ ગયું છે. આ પ્રથમ વરસાદે જ નડિયાદ નગરપાલિકાના પ્રી-મોન્સૂન પ્લાનની પોલ ખોલી નાખી છે. પાલિકાના દાવાઓ વચ્ચે તંત્રનો એક્શન પ્લાન તદ્દન ફેલ સાબિત થયો છે. શહેરમાં ચારેય તરફ પાણી ભરાઈ જતાં નડિયાદ શહેર પૂર્વ અને પશ્ચિમ એમ બે ભાગમાં વહેંચાઈ ગયું છે. બંને ભાગોને જોડતા માર્ગો બંધ થઈ જતાં સ્થાનિક નાગરિકો ભારે મુશ્કેલીમાં મુકાયા છે અને તંત્ર સામે લોકોનો આક્રોશ જોવા મળી રહ્યો છે.
રેલવે સ્ટેશન નજીક કલાકો સુધી ટ્રાફિકજામ
ભારે વરસાદના પગલે શહેરના નીચાણવાળા વિસ્તારો અને તમામ મુખ્ય અંડરપાસ (ગરનાળા) પાણીમાં ગરકાવ થઈ ગયા છે. નડિયાદના શ્રેયસ ગરનાળા, ખોડિયાર ગરનાળા, માઇમાતા ગરનાળા અને વૈશાલી ગરનાળામાં ગળાડૂબ પાણી ભરાઈ જતાં વાહનવ્યવહાર માટે તેને બંધ કરવાની ફરજ પડી છે. આ ઉપરાંત, દેસાઈ વગા સહિતના રહેણાંક વિસ્તારોમાં પણ ઘૂંટણસમા પાણી ભરાઈ ગયા છે. ગરનાળાઓ બંધ થવાના કારણે બસ સ્ટેન્ડ અને રેલવે સ્ટેશન નજીકના વિસ્તારોમાં વાહનોની લાંબી કતારો લાગી હતી અને કલાકો સુધી ભારે ટ્રાફિકજામના દ્રશ્યો સર્જાયા હતા.
