Bhujની ખાસ જેલમાં વાહનોમાં બ્લાસ્ટ થયા બાદ લાગી ભીષણ આગ

ભુજના સરપટ ગેટ પાસે આવેલી જુની જેલને પાલારા પાસે ખસેડવામાં આવ્યા બાદ ખાલી પડેલી જેલમાં બી ડિવિઝન પોલીસ દ્વારા જપ્ત કરાયેલા વાહનો રાખવામાં આવ્યા હતા. આ વાહનોના ખડકલામાં બપોરના સમયે અચાનક આગ ભભૂકી ઉઠતાં ધુમડાના ગોટેગોટા દૂર દૂર સુધી જોવા મળતા લોકોના ટોળે ટોળા ઘટના સ્થળે એકત્રિત થઈ ગયા હતા. પાલિકા હસ્તકના ફાયર વિભાગની ટીમને પણ ઘટના સ્થળે બોલાવી લેવામાં આવતા પાણીનો મારો ચલાવીને દોઢેક કલાકની જહેમત બાદ આગને કાબૂમાં લેવામાં સફળતા મળી હતી.

આગને કારણે ધુમાડાના ગોટેગોટા આકાશમાં ઉડ્યા

આગ કાબૂમાં આવી ત્યાં સુધીમાં મોટાભાગના વાહનોનો જથ્થો બળીને ખાખ થઈ ગયો હતો. બપોરના ત્રણથી સાડા ત્રણના અરસામાં બી ડિવિઝન પોલીસ સ્ટેશનની બાજુમાં આવેલી જુની જેલમાં અચાનક બ્લાસ્ટ સાથે આગ ભભૂકી ઉઠતાં આજુબાજુનાં વિસ્તારોમાં ભયનો માહોલ ફેલાઈ ગયો હતો. જોતજોતામાં આગને કારણે ધુમાડાના ગોટેગોટા આકાશમાં છવાઈ જતાં દૂર દૂર સુધી દેખાયા હતા. ઘટના સ્થળે લોકોના ટોળેટોળા ઉમટી પડયા હતા. જુની જેલ પાસે આવેલો રસ્તો કાળા ડીબાંગ ધુમાડામાં ગરકાવ થઈ ગયો હતો. આજુબાજુના રહેવાસીઓના પણ શ્વાસ અધ્ધર થઇ ગયા હતા. તાત્કાલિક અસરથી પોલીસ વિભાગ હરકતમાં આવી ગયો હતો. પાલિકા હસ્તકના ફાયર વિભાગને જાણ કરાતા તરત જ ફાયર બ્રિગેડની ટીમ ઘટના સ્થળે ધસી ગઈ હતી.

અહીં બી ડિવિઝન પોલીસ દ્વારા જપ્ત કરવામાં આવેલા વાહનોનો ખડકલો કરવામાં આવ્યો હતો, જેમાં કોઈ કારણસર બ્લાસ્ટ થતાં આગ ભભૂકી ઉઠી હતી. પવનને કારણે આગે થોડીવારમાં જ વિકરાળ રૂપ ધારણ કરી લીધુ હતું અને અહીં પડેલા મોટાભાગના વાહનો સહિત અન્ય વાહનો પણ ઝપટમાં આવી ગયા હતા. ફાયરની ટીમને આગ પર કાબૂ મેળવવામાં દોઢ કલાક જેટલો સમય લાગ્યો હતો. આગની જાણ થતાં પ્રાંત અધિકારી - ઈન્ચાર્જ ચીફ ઓફિસર સહિત નગરપાલિકાનો સ્ટાફ કાઉન્સિલરો પણ ઘટના સ્થળે પહોંચી ગયા હતા અને આગને કાબૂમાં લેવામાં મદદરૂપ બન્યા હતા.

બી ડિવિઝન પોલીસે જપ્ત કરેલા વાહનો આગમાં બળીને ખાખ

જુની જેલમાં બી ડિવિઝન પોલીસ દ્વારા જપ્ત કરવામાં આવેલા અંદાજિત 500થી 600 જેટલા વાહનોનો ખડકલો કરવામાં આવ્યો હતો. આ સિવાય અન્ય પણ 400 જેટલા વાહનો અહીં રાખવામાં આવ્યા હતા, જેમાં બપોરના સમયે બ્લાસ્ટ બાદ આગ ભભૂકી ઉઠી હતી. જેને કારણે અહીં રાખવામાં આવેલા મોટાભાગનાં વાહનો આગની ઝપટમાં આવી ગયા હતા.

અમુક વાહનો રીતસરના ઓગળીને રસમાં ફેરવાઈ ગયા

જુની જેલમાં લાગેલી આગ એટલી ભયાનક હતી કે, અમુક વાહનોનો તો રીતસરનાં ઓગળીને રસમાં ફેરવાઇ ગયા હતા. જેને કારણે ફાયર વિભાગની ટીમને પણ આગ ઉપર કાબૂ મેળવવા માટે ઘણી જહેમત ઉઠાવવી પડી હતી. વળી, ખરા તડકે આગ લાગવાને કારણે સ્થળ પર ગરમીમાં પણ વધારો થઇ ગયો હતો. છતા પણ ફાયર બ્રિગેડની ટીમે આગને કાબૂમાં લેવા કોઇ કસર બાકી ન રાખી.

લોકો પોતાના મોબાઈલમાં આગના દૃશ્યો કેદ કરવા લાગ્યા

જુની જેલમાં લાગેલી આગને જોવા માટે થોડી વારમાં જ લોકોના ટોળે ટોળા ઉમટી પડતાં ફાયર વિભાગને પણ પોતાની કામગીરીમાં મુશ્કેલી ઊભી થતાં તુરત જ પોલીસ સ્ટાફ હરકતમાં આવી ગયો હતો અને લોકોને દૂર ખસેડવાના કામમાં ગોઠવાઈ ગયો હતો તો બીજી તરફ લોકો પણ પોતાપોતાના મોબાઈલમાં આગના દૃશ્યોનું શૂટિંગ કરવામાં લાગી ગયા હતા.