Morbi: હળવદમાં પ્રેમ પ્રકરણમાં આધેડની હત્યા, 10 શખ્સોએ તીક્ષ્ણ હથિયારના ઘા ઝિંક્યા

મોરબીના હળવદમાં પ્રેમ પ્રકરણમાં એક આધેડની હત્યા કરી દેવાની ઘટના સામે આવી છે. પરિણીતાને ભગાડી જનાર યુવકના ઘરે હુમલો કરવામાં આવ્યો છે. 10 જેટલા શખ્સોએ ઘરમાં ઘૂસીને હુમલો કર્યો હતો. જેમાં આધેડને તિક્ષ્ય હથિયારના ઘા ઝિંકાયા હતાં. આ ઘટનામાં યુવકના કાકાનું મોત નિપજ્યું છે. જ્યારે તેનો ભાઈ ઈજાગ્રસ્ત થયો છે. આ ઘટનાની જાણ થતાં જ પોલીસ ઘટના સ્થળે પહોંચી હતી અને મૃતકના મૃતદેહને પોસ્ટમોર્ટમ અર્થે ખસેડી વધુ કાર્યવાહી હાથ ધરી છે.

યુવકનો ભાઈ કિરણ ધામેચા ઈજાગ્રસ્ત થયો

પ્રાપ્ત વિગતો પ્રમાણે મોરબીના હળવદના સુરવદરમાં પ્રેમ પ્રકરણમાં હત્યા કરી દેવામાં આવી છે. શક્તિનગરની પરીણિતાને સુરવદરનો યુવાન મનોજ ધામેચા ભગાડી જતા યુવકના ઘરે 10 જેટલા શખ્સોએ હુમલો કર્યો હતો. જેમાં યુવકના કાકાને તીક્ષ્ણ હથિયારના ઘા મારતાં તેમનું મોત નિપજ્યું હતું. વહેલી સવારે બે કારમાં 10 જેટલા શખ્સો આવ્યા હતાં અને હુમલો કર્યો હતો. આ હુમલામા યુવકનો ભાઈ કિરણ ધામેચા ઈજાગ્રસ્ત થયો છે.

યુવકના કાકા ચંદુભાઈ ધામેચાનું મોત

આ ઘટનામાં યુવકના કાકા ચંદુભાઈ ધામેચાનું મોત નિપજ્યું છે. તેમના મૃતદેહને પોલીસે પોસ્ટમોર્ટમ અર્થે ખસેડીને વધુ કાર્યવાહી હાથ ધરી છે. હત્યાની ઘટનાની જાણ થતાં જ પોલીસ તાત્કાલિક ઘટના સ્થળે પહોંચી હતી. પોલીસે હાલમાં ફરિયાદ લેવાની તજવીજ હાથ ધરી છે. વહેલી સવારે થયેલા ખુની હુમલાને કારણે સમગ્ર વિસ્તારમાં ચકચાર મચી જવા પામી હતી.