ગુજરાતમાં કમોસમી વરસાદને કારણે ખેડૂતોનો ઉભો પાક નષ્ટ થઈ ગયો છે. ઘણા ખેડૂતોની મગફળી માવઠાને કારણે ધોવાઈ ગઈ છે. ખેતરમાં પાણીને કારણે પાક નિષ્ફળ ગયો છે. ખેડૂતોના મોઢે આવેલો કોળિયો છીનવાઈ ગયો છે. ત્યારે સરકારે મંત્રીઓને અસરગ્રસ્ત વિસ્તારોમાં નુકસાનીનો તાગ મેળવવા માટે મોકલ્યા હતાં. બીજી તરફ ગીર સોમનાથના ઉનામાં પાક નુકસાનીના સરવેનો ખેડૂતો દ્વારા બહિષ્કાર કરવામાં આવ્યો છે.
કમોસમી વરસાદને પગલે ખેડૂતોની હાલત કફોડી બની
ગુજરાતમાં અનેક વિસ્તારોમાં માવઠાને કારણે ખેતીને ભારે નુકસાન પહોંચ્યુ છે. હવે પાક નુકસાનીના સરવેને લઈને ફરી વિવાદ ઉભો થયો છે. ગીર સોમનાથ જિલ્લાના ઉનામાં પાક નુકસાનીના સરવેનો ખેડૂતો દ્વારા બહિષ્કાર કરવામાં આવ્યો છે. કાજરડી ગામમાં ખેડૂતો ભેગા થયા હતાં જ્યાં એક જ સૂરે પાક નુકસાનીના સરવેનો બહિષ્કાર કરવામાં આવ્યો હતો. સરકારે સરવે કરીને વળતર આપવાની જાહેરાત કરતાં ખેડૂતોએ વિરોધ કર્યો હતો. આ ખેડૂતો દ્વારા સો ટકા નુકસાનું વળતર આપવા માટે રજૂઆત કરવામાં આવી છે.
