ગુજરાતમાં ચોમાસામાં થયેલા ભારે વરસાદ અને ત્યાર બાદ થયેલા માવઠાને કારણે ખેતીને ભારે નુકસાન થયુ હતું. જેથી રાજ્ય સરકારે ઝડપથી સરવેની કામગીરી કરીને ઐતિહાસિક રાહત પેકેજ જાહેર કર્યું છે. રાહત સહાય લેવા માટે ખેડૂતોએ ફોર્મ પણ ભરી દીધા છે. પરંતુ ઓગસ્ટ મહિનામાં જે ફોર્મ ભરવામાં આવ્યા હતાં તે ખેડૂતોને હજી સુધી સહાયના પૈસા જમા નહીં થતાં શિયાળુ વાવેતર અટકી ગયું હોવાની વિગતો પ્રાપ્ત થઈ છે.
તાત્કાલિક ચૂકવવામાં આવે તેવી માગ
જૂનાગઢ જિલ્લામાં આ વર્ષે ઓગસ્ટ મહિનામાં ભારે વરસાદ થવાને કારણે જિલ્લાના છ તાલુકાઓના ગામડામાં વ્યાપક નુકસાન પહોંચ્યું હતું. આ વિસ્તારના ખેડૂતોને સ્પેશિયલ રાહત પેકેજ જાહેર કરાયું હતું. આ પેકેજ અંતર્ગત કેટલાક ખેડૂતોને હજી સહાય મળી નથી. જેના કારણે આગળનું વાવેતર કરવું કે નહીં તેની ચિંતા સતાવી રહી છે. ખેડૂતો દ્વારા આ સહાય તાત્કાલિક ચૂકવવામાં આવે તેવી માગ કરવામાં આવી છે.
