અમદાવાદ શહેરમાં નશાના કારોબાર સામે પોલીસે લાલ આંખ કરી છે, ત્યારે પૂર્વ વિસ્તારના રખિયાલમાંથી મેફેડ્રોન (MD) ડ્રગ્સ સાથે એક યુવકને ઝડપી પાડવામાં પોલીસને મોટી સફળતા મળી છે. રખિયાલ પોલીસની ટીમે બાતમીના આધારે વોચ ગોઠવીને આ યુવકને પ્રતિબંધિત નશીલા પદાર્થ સાથે રંગેહાથ દબોચી લીધો હતો. પ્રાથમિક પૂછપરછમાં સામે આવ્યું છે કે, પકડાયેલો યુવક પોતે ડ્રગ્સનો બંધાણી છે અને પોતાના નશાનો ખર્ચ કાઢવા તેમજ લત પૂરી કરવા માટે જ તે ડ્રગ્સની હેરાફેરીના આ કાળા કારોબારમાં કુરિયર અને પેડલર તરીકે ઝંપલાવી બેઠો હતો.
રૂ.12 હજારનું ડ્રગ્સ જપ્ત અને કાલુપુર કનેક્શન
પોલીસે પકડેલા આરોપી પાસેથી અંદાજે રૂ.12,000ની બજાર કિંમત ધરાવતું 4.200 ગ્રામ એમડી ડ્રગ્સનો જથ્થો કબ્જે કર્યો છે. આરોપીની કડક પૂછપરછ દરમિયાન ડ્રગ્સના સોર્સ અંગે મોટો ખુલાસો થયો છે. પકડાયેલા યુવકે કબૂલાત કરી છે કે, તે આ નશાનો જથ્થો કાલુપુર રેલ્વે સ્ટેશન પાસે આવતા એક અજાણ્યા શખ્સ પાસેથી ખરીદીને લાવતો હતો. પોતે નશો કરવા માટે અને આસપાસના અન્ય બંધાણીઓને ઊંચા ભાવે છૂટક વેચાણ કરીને કમાણી કરવાના ઈરાદે તે આ માલ લાવ્યો હોવાનું બહાર આવ્યું છે.
