અગાઉ લેવાયેલી પરીક્ષામાં પેપર લીકની ગંભીર ઘટનાઓ અને વ્યાપક વિવાદ બાદ, હવે રાષ્ટ્રીય સ્તરની મેડિકલ પ્રવેશ પરીક્ષા 'NEET' ફરીથી યોજવા માટે અમદાવાદ શહેર સહિત સમગ્ર રાજ્યનું વહીવટી તંત્ર એક્શન મોડમાં આવી ગયું છે. આગામી 21 જૂનના રોજ આ મહત્વપૂર્ણ પરીક્ષાનું આયોજન થવા જઈ રહ્યું છે, જેને લઈને આ વખતે પ્રશાસન દ્વારા સુરક્ષાના અભૂતપૂર્વ અને અત્યંત કડક પગલાં લેવામાં આવ્યા છે.
પોલીસ બંદોબસ્તમાં વ્યાપક વધારો
અમદાવાદના કલેક્ટર ભવ્ય વર્માએ જણાવ્યું હતું કે આ વખતે પરીક્ષામાં કોઈપણ પ્રકારની ગેરરીતિ કે પેપર લીકની ઘટના ફરી ન બને તે માટે પ્રશાસન સંપૂર્ણપણે સજ્જ અને સતર્ક બન્યું છે. પરીક્ષા કેન્દ્રો પર પોલીસ બંદોબસ્તમાં વ્યાપક વધારો કરવાનો નિર્ણય લેવામાં આવ્યો છે. આ ઉપરાંત, પેપરના ડિસ્પેચ સેન્ટરથી લઈને પરીક્ષા કેન્દ્ર સુધીના તમામ રૂટ પર કડક દેખરેખ રાખવામાં આવશે.
