Ahmedabad નું ઓઢવ બન્યું જળમગ્ન, સ્થાનિકો ઘૂંટણસમા પાણીમાં મૂસાફરી કરવા મજબૂર

અમદાવાદ શહેરમાં ફરી એકવાર સામાન્ય વરસાદમાં જળબંબાકારની સ્થિતિ સર્જાઈ છે. ખાસ કરીને ઓધવ વિસ્તારમાં વરસાદી પાણી ભરાતા સ્થાનિકો અને વાહનચાલકો ભારે હાલાકીનો સામનો કરી રહ્યા છે. ઓઢવ ફાયર સ્ટેશન પાસે પણ પાણી ભરાયા હોવાથી વાહનવ્યવહાર ખોરવાયો છે. રસ્તાઓ પર ઘૂંટણસમા પાણી ભરાઈ જવાથી અનેક વાહનો બંધ પડી ગયા હતા અને લોકોને મુશ્કેલી વેઠવી પડી હતી.

AMC ની પ્રી-મોન્સૂન કામગીરીની પોલ ખૂલી

મહત્વનું છે કે, આ દ્રશ્યો ફરી એકવાર અમદાવાદ મ્યુનિસિપલ કોર્પોરેશન (AMC)ના પ્રી-મોન્સૂન કામગીરીના દાવાઓ પર સવાલ ઉઠાવી રહ્યા છે. ઓઢવમાં પાણી ભરાવાની સમસ્યા વર્ષો જૂની છે. દર ચોમાસામાં અહીં પાણી ભરાય છે અને જીવન અસ્તવ્યસ્ત થઇ જાય છે. લોકોએ આ અંગે અનેક રજૂઆતો કરી છે પરંતુ પરિસ્થિતિમાં કોઈ સુધારો થયો નથી. વરસાદી પાણીના યોગ્ય નિકાલની વ્યવસ્થાના અભાવે આ સમસ્યા દર વર્ષે ગંભીર સ્વરૂપ ધારણ કરે છે.

સ્થાનિકોને દ્વારા રજૂઆતો છતાં તંત્રએ કોઈ કામ કર્યું નહીં

સત્તાવાળાઓ દ્વારા આપવામાં આવતા આશ્વાસનો માત્ર કાગળ પર જ રહે છે અને જમીની સ્તરે પરિસ્થિતિમાં કોઈ ફેરફાર થતો નથી. શહેરના એક મહત્વના વિસ્તારમાં આટલી ગંભીર અને કાયમી સમસ્યા હોવા છતાં તેનું નિરાકરણ ન આવવું એ તંત્રની બેદરકારી સ્પષ્ટ દર્શાવે છે. ઓઢવના રહીશો માંગ કરી રહ્યા છે કે આ સમસ્યાનો કાયમી ઉકેલ લાવવામાં આવે જેથી દર વર્ષે ચોમાસામાં તેમને આવી હાલાકી ન ભોગવવી પડે. પાણીના યોગ્ય નિકાલ માટે નક્કર પગલાં ભરવા અને ડ્રેનેજ સિસ્ટમને સુધારવા તાત્કાલિક કાર્યવાહી કરવી અનિવાર્ય છે.