દેશના અલગ-અલગ રાજ્યોમાં તાજેતરમાં દિલ્હી અને લખનઉ ખાતે બનેલી ભયાનક આગની ઘટનાઓ બાદ અમદાવાદ મહાનગરપાલિકાનું તંત્ર સંપૂર્ણપણે હરકતમાં આવ્યું છે. અમદાવાદ શહેરમાં આવી કોઈ અનિચ્છનીય દુર્ઘટના ન ઘટે તે માટે મનપાના ફાયર વિભાગ દ્વારા કડક ચેકિંગ ઝુંબેશ હાથ ધરવામાં આવી છે. ફાયર સેફ્ટીના સાધનો અને નિયમોના ભંગ બદલ મનપાએ આક્રમક વલણ અપનાવી કાયદેસરની કાર્યવાહી શરૂ કરી દીધી છે.
ફાયર સેફ્ટી અને ટ્રાફિક નિયમોના ઉલ્લંઘન બદલ 8 હોટેલો કરાઈ સીલ
આ મેગા ડ્રાઈવ અંતર્ગત ફાયર વિભાગની અલગ-અલગ ટીમોએ શહેરની અનેક હોટેલોમાં ઓચિંતું ચેકિંગ હાથ ધર્યું હતું. આ તપાસ દરમિયાન ફાયર એનઓસી ન હોવા બદલ તેમજ અલગ-અલગ ટ્રાફિક અને પાર્કિંગના નિયમોના ઉલ્લંઘન બદલ તંત્રએ લાલ આંખ કરી છે. ફાયર વિભાગે તાત્કાલિક પગલાં લેતા કુલ 37 હોટેલોને વહીવટી નોટિસ ફટકારી છે, જ્યારે નિયમોનું સરેઆમ ઉલ્લંઘન કરતી 8 હોટેલોને મોક આઉટ કરી સીલ મારી દીધા છે.
