Ahmedabad News : ગુજરાતમાં ગ્લુ ટ્રેપના ઉત્પાદન, વેચાણ અને ખરીદી પર પ્રતિબંધ!, રાજ્ય સરકારે હાઇકોર્ટમાં રજૂ કર્યો જવાબ

ગુજરાત સરકાર દ્વારા ઉંદર અને અન્ય નાના પ્રાણીઓને પકડવા માટે ઉપયોગમાં લેવાતી ગ્લુ ટ્રેપના ઉત્પાદન, વેચાણ અને ખરીદી પર પ્રતિબંધ મૂકવામાં આવ્યો છે. રાજ્ય સરકરે આ અંગે ગુજરાત હાઈકોર્ટમાં જવાબ રજૂ કર્યો છે.

ગ્લુ ટ્રેપ મુદ્દે હાઈકોર્ટમાં રજૂઆત

ગુજરાત હાઈકોર્ટમાં ગ્લુ ટ્રેપ પર પ્રતિબંધ મૂકવા માટે થયેલી રજૂઆત બાદ સરકારે આ મામલે ગંભીરતાથી વિચારણા કરી હતી. આ માટે એક ખાસ જોઈન્ટ ડિપાર્ટમેન્ટની મિટિંગનું આયોજન કરવામાં આવ્યું હતું. જેમાં કૃષિ વિભાગ સહિત ગૃહ વિભાગના ઉચ્ચ અધિકારીઓ હાજર રહ્યા હતા. આ બેઠકમાં ગ્લુ ટ્રેપના ઉપયોગથી થતા અમાનવીય કૃત્યો અને નાના જીવો પર થતી ક્રૂરતા અંગે ચર્ચા કરવામાં આવી હતી.

ક્રૂરતાને ધ્યાનમાં રાખીને સરકારે લીધો નિર્ણય

સરકારે હાઈકોર્ટને જણાવ્યું છે કે, ગ્લુ ટ્રેપનો ઉપયોગ ઉંદરો અને અન્ય પ્રાણીઓ માટે અત્યંત પીડાદાયક હોય છે જેના કારણે તેઓ ધીમે ધીમે મૃત્યુ પામે છે. આ ક્રૂરતાને ધ્યાનમાં રાખીને સરકારે નિર્ણય લીધો છે કે, રાજ્યમાં ગ્લુ ટ્રેપનું ઉત્પાદન, વેચાણ અને ખરીદી હવે ગુનો ગણાશે. આ નિર્ણયથી જીવદયા પ્રેમીઓ અને પ્રાણી કલ્યાણ સસ્થાઓએ સંતોષ વ્યક્ત કર્યો છે. આશા રાખવામાં આવે છે કે, આ પ્રતિબંધથી પ્રાણીઓ પર થતી અમાનવીય ક્રૂરતા અટકાવી શકાશે.