Ahmedabadના બોડકદેવમાં રૂ.3 કરોડની લેવડદેવડના મામલે મારામારી કરનાર 3 શખ્સો વિરુદ્ધ ફરિયાદ

અમદાવાદના બોડકદેવ વિસ્તારમાં પૈસાની લેવડદેવડના વિવાદમાં મારામારીની એક ગંભીર ઘટના સામે આવી હતી. કેટલાક ઈસમોએ એક વ્યક્તિની ઓફિસમાં ઘૂસીને તેના અને તેના મિત્રો પર હુમલો કર્યો હતો. આ હુમલામાં બે વ્યક્તિઓને તીક્ષ્ણ હથિયારથી ઈજા પહોંચી હતી. આ મામલે બોડકદેવ પોલીસ સ્ટેશનમાં ત્રણ વ્યક્તિઓ વિરુદ્ધ ફરિયાદ નોંધવામાં આવી હતી. વિક્રમ દેસાઈ, ફુલાભાઈ રબારી અને એક અજાણ્યા વ્યક્તિ સહિત કુલ ત્રણ ઈસમોએ ફરિયાદીની ઓફિસમાં જઈને આ હુમલો કર્યો હતો.

વિક્રમ દેસાઈ, ફૂલા ભાઈ રબારી સહિત 3 સામે ફરિયાદ

આરોપીઓએ આક્ષેપ કર્યો હતો કે ફરિયાદી પાસેથી તેમને ૩ કરોડ રૂપિયા લેવાના બાકી છે. આ વાત પર બોલાચાલી થઈ હતી અને મામલો ઉગ્ર બન્યો હતો. બોલાચાલી બાદ આરોપીઓએ ભેગા મળીને ફરિયાદી અને તેના મિત્રોને ઢોર માર માર્યો હતો. આરોપીઓ દ્વારા હુમલામાં તીક્ષ્ણ હથિયારનો પણ ઉપયોગ કરવામાં આવ્યો હતો. જેના કારણે બે વ્યક્તિઓને ઈજાઓ પહોંચી હતી. હુમલા બાદ ગંભીર રીતે ઈજાગ્રસ્ત થયેલા બંને વ્યક્તિઓને તાત્કાલિક સારવાર માટે હોસ્પિટલ ખસેડવામાં આવ્યા હતા.

બોડકદેવ પોલીસ સ્ટેશનમાં નોંધાઈ ફરિયાદ

આ ઘટના બાદ ઓફિસમાં ભયનો માહોલ ફેલાઈ ગયો હતો. આ મામલે ફરિયાદી દ્વારા બોડકદેવ પોલીસ સ્ટેશનમાં સત્તાવાર ફરિયાદ નોંધાવવામાં આવી હતી. પોલીસે હુમલો કરનાર ત્રણેય આરોપીઓ વિરુદ્ધ ગુનો નોંધીને વધુ તપાસ હાથ ધરી હતી. પોલીસે આરોપીઓને પકડવા માટેના ચક્રો ગતિમાન કર્યા છે અને ટૂંક સમયમાં તેમને ઝડપી પાડવામાં આવશે તેવી ખાતરી આપી હતી. આ ઘટનાએ ફરી એકવાર પૈસાની લેવડદેવડના વિવાદોના કારણે ઉદ્ભવતા કાયદો અને વ્યવસ્થાના પ્રશ્નોને પ્રકાશિત કર્યા છે.