Ahmedabadમાં ફરી એકવાર અસામાજીક તત્વો દ્વારા જાહેરમાં કરાતી મારામારીનો વીડિયો થયો વાયરલ

શહેરમાં ગુનાખોરીનો ગ્રાફ દિવસેને દિવસે વધી રહ્યો છે. ત્યારે વધુ એક ચિંતાજનક ઘટનાનો વીડિયો સોશિયલ મીડિયા પર વાયરલ થયો છે. અમદાવાદના સોનલ ચાર રસ્તા પાસે બે જૂથો વચ્ચે જાહેરમાં મારામારી થઈ હતી. જેમાં પથ્થર અને છરી વડે હુમલો કરવામાં આવ્યો હતો. આ સમગ્ર ઘટનાનો વીડિયો વાયરલ થતા લોકોમાં ભય અને આશ્ચર્યનો માહોલ છે. વીડિયોમાં સ્પષ્ટપણે જોઈ શકાય છે કે કેટલાક યુવકો વચ્ચે ઉગ્ર બોલાચાલી થઈ હતી અને બાદમાં તે મારામારીમાં પરિણમી હતી.

પથ્થર અને છરી વડે હુમલો કરતો વીડિયો વાયરલ

આ દરમિયાન એકબીજા પર પથ્થર ફેંકવામાં આવ્યા હતા અને છરી વડે પણ હુમલો કરવામાં આવ્યો હતો. આ ઘટના બની ત્યારે આસપાસના રસ્તા પરથી વાહનો પસાર થઈ રહ્યા હતા. પરંતુ કોઈની પણ દરમિયાનગીરી વિના આ મારામારી ચાલુ રહી હતી. આ વીડિયો વાયરલ થયા બાદ વેજલપુર પોલીસે તાત્કાલિક આ અંગે તપાસ હાથ ધરી છે. પોલીસે વીડિયોના આધારે આરોપીઓની ઓળખ કરવાનો પ્રયાસ કરી રહી છે.

વીડિયો અંગે વેજલપુર પોલીસે તપાસ હાથ ધરી

હાલ આ મારામારીનું કારણ શું હતું તે સ્પષ્ટ થયું નથી પરંતુ પોલીસનું માનવું છે કે અંગત અદાવત કે જૂના ઝઘડાને કારણે આ ઘટના બની હોઈ શકે છે. આ પ્રકારની ઘટનાઓ શહેરમાં કાયદો અને વ્યવસ્થાની પરિસ્થિતિ પર ગંભીર સવાલો ઊભા કરે છે. જાહેરમાં છડેચોક મારામારી અને હથિયારોનો ઉપયોગ થવાથી સામાન્ય નાગરિકોની સુરક્ષા જોખમમાં મુકાઈ છે. પોલીસ દ્વારા આરોપીઓને ઝડપી પાડીને કડક કાર્યવાહી કરવામાં આવે તેવી લોકો માંગ કરી રહ્યા છે.