Ahmedabad News : દૂષિત પાણીનો મુદ્દો ગંભીર બન્યો, વિરમગામના ભાજપ નેતા ઉમેશ વ્યાસની ઉપવાસ દરમિયાન લથડી

વિરમગામમાં દૂષિત પાણી અને ભૂગર્ભ ગટરની નબળી કામગીરીના પ્રશ્નને લઈને નગરપાલિકા (નપા) સામે અચોક્કસ મુદતના ઉપવાસ પર બેઠેલા ભાજપના કાઉન્સિલર ઉમેશ વ્યાસની તબિયત ચોથા દિવસે લથડી છે. વિરમગામના વોર્ડ નંબર-6 ના કાઉન્સિલર વ્યાસે સ્થાનિક પ્રશ્નોનું નિરાકરણ ન આવતા આ ઉપવાસ આંદોલન શરૂ કર્યું હતું, પરંતુ ઉપવાસના ચોથા દિવસે તબિયત બગડતા તંત્રમાં દોડધામ મચી છે.

ભૂગર્ભ ગટરની નબળી કામગીરી સામે રોષ

ઉમેશ વ્યાસે મુખ્યત્વે બે મુદ્દાઓને લઈને ઉપવાસ શરૂ કર્યા હતા: એક તો, સ્થાનિક વિસ્તારમાં દૂષિત પાણીનો પુરવઠો અને બીજું, ભૂગર્ભ ગટર યોજનાની અત્યંત નબળી કામગીરી. આ મામલે વારંવાર રજૂઆતો કરવા છતાં કોઈ ઉકેલ ન આવતા તેમણે આ આકરા પગલાં ભર્યા છે. તેમણે માંગ કરી છે કે આ નબળી કામગીરી માટે જવાબદાર કોન્ટ્રાક્ટરને બ્લેકલિસ્ટ કરવામાં આવે અને લોકોને શુદ્ધ પાણી મળે તેની વ્યવસ્થા કરવામાં આવે.

તંત્ર દ્વારા રજૂઆત સાંભળવામાં આવી

ઉમેશ વ્યાસની તબિયત લથડતા તાત્કાલિક મામલતદાર અને પોલીસની ટીમ ઘટનાસ્થળે પહોંચી હતી. તેમણે ઉમેશ વ્યાસની રજૂઆતો સાંભળી હતી અને આ મામલે યોગ્ય કાર્યવાહી કરવાની ખાતરી આપી હતી. જોકે, ઉમેશ વ્યાસે ઉપવાસ ચાલુ રાખવાનો નિર્ણય કર્યો છે. આ ઘટના બાદ સ્થાનિક લોકોમાં પણ વ્યાપક ચર્ચા થઈ રહી છે અને તંત્ર સામે રોષ વધી રહ્યો છે, કારણ કે લોકો પણ લાંબા સમયથી આ સમસ્યાઓનો સામનો કરી રહ્યા છે.