અમદાવાદ શહેરમાં સામાન્ય વરસાદે ફરી એકવાર તંત્રની પ્રી-મોન્સૂન કામગીરીની પોલ ખોલી નાખી છે. શહેરના અનેક વિસ્તારોમાં વરસાદી પાણી ભરાતા જળબંબાકારની સ્થિતિ સર્જાઈ છે. વસ્ત્રાપુર, મેમનગર, નરોડા, ઓઢવ, થલતેજ, ખોખરા, વાડજ અને સરખેજ જેવા વિસ્તારોમાં રસ્તાઓ પર ઘૂંટણસમા પાણી ભરાઈ ગયા છે. આ પરિસ્થિતિને કારણે વાહનચાલકો અને રાહદારીઓને ભારે હાલાકીનો સામનો કરવો પડી રહ્યો છે. અખબારનગર અંડરપાસમાં પણ પાણી ભરાતા તેને વાહનવ્યવહાર માટે બંધ કરવો પડ્યો હતો, જેના કારણે ટ્રાફિકજામની સમસ્યા વધુ વકરી હતી. ખોખરા જેવા વિસ્તારોમાં નવી ડ્રેનેજ લાઇન નાખ્યા બાદ પણ પાણી ભરાતા લોકોમાં ભારે રોષ જોવા મળી રહ્યો છે.
સ્થાનિકોને મુશ્કેલી વેઠવાનો વારો આવ્યો
શહેરના મુખ્ય માર્ગો પર પાણી ભરાવાને કારણે વાહનો બંધ પડી જવાના અનેક બનાવો બન્યા છે. વાહનચાલકોને પોતાના વાહનો ધક્કો મારીને કાઢવાની ફરજ પડી હતી. પૂર્વ અમદાવાદના અનેક વિસ્તારોમાં ટ્રાફિક જામ થતા વાહનવ્યવહાર ખોરવાયો હતો. ઓઢવ વિસ્તારમાં તો વર્ષોથી આ સમસ્યા કાયમી છે, અને સ્થાનિકોની અનેક રજૂઆતો છતાં પરિસ્થિતિમાં કોઈ સુધારો થયો નથી. આ દ્રશ્યો દર્શાવે છે કે વરસાદી પાણીના નિકાલની યોગ્ય વ્યવસ્થાના અભાવે લોકોને દર વર્ષે આ મુશ્કેલી વેઠવી પડે છે.
વાસણા બેરેજના દરવાજા ખોલવામાં આવ્યા
બીજી તરફ, ભારે વરસાદને પગલે સાબરમતી નદીનું લેવલ વધતા વાસણા બેરેજના દરવાજા ખોલવામાં આવ્યા છે. નદીમાં હાલ 5800 ક્યુસેક પાણી છોડવામાં આવ્યું છે, અને કેનાલમાં 400 ક્યુસેક પાણી છોડવામાં આવ્યું છે. આ પગલાં નદીના જળસ્તરને નિયંત્રણમાં રાખવા માટે લેવાયા છે, પરંતુ શહેરના નીચાણવાળા વિસ્તારોમાં પાણી ભરાવાની સમસ્યા યથાવત રહી છે. સત્તાવાળાઓએ આ સમસ્યાના કાયમી નિવારણ માટે નક્કર પગલાં ભરવા અનિવાર્ય છે, જેથી શહેરના નાગરિકોને દર ચોમાસે આવી હાલાકીનો સામનો ન કરવો પડે.
