અમરેલી ખાતે મહિલા હેલ્પલાઇન 181 અને એસ.ટી.ડ્રાઇવરની સતર્કતાના કારણે આત્મહત્યા કરવા નીકળેલી યુવતીનું કાઉન્સેલિંગ કરી તેને સુરક્ષિત પરિવાર સુધી પહોંચાડવામાં આવી હતી. એક જાગૃત નાગરિકે 181 મહિલા હેલ્પ લાઈન-અભયમ પર ફોન કરી જણાવ્યું હતુ કે, તે પોતે એસ.ટી બસના ડ્રાઈવર છે અને તેમની બસમાં એક અજાણી યુવતી મુસાફરી કરી રહી છે અને આત્મહત્યા કરવા ઘરેથી નીકળી ગઈ છે તેવુ જણાવે છે. આ ટીમ પહોંચે નહીં ત્યાં સુધી ડ્રાઈવરે યુવતીને પોલીસ સ્ટેશન ખાતે સુરક્ષિત રીતે બેસાડી રાખી હતી.
181 મહિલા હેલ્પ લાઇનની ટીમે યુવતી સાથે વાતચીત કરી
ત્યારબાદ 181 મહિલા હેલ્પ લાઇનની ટીમે યુવતી સાથે વાતચીત કરતા યુવતી એ જણાવેલું કે તેમણે ઘણા વર્ષો પહેલા હોમિયોપેથી અભ્યાસક્રમમાં એડમિશન લીધુ હતું. તે સમયે પોતે ખૂબ મહેનત કરી હતી, છતા તેમને ઈચ્છિત પરિણામ ન મળ્યું ત્યારબાદ તેમને ફરીવાર બીજા વર્ષે પણ અથાક મહેનત કરવા છતાં પણ તેમને ઈચ્છિત પરિણામ ન મળતા પોતે ખૂબ હતાશ થઈ ગયા હતા અને પોતે માનસિક બીમારીનો ભોગ બન્યા હતા. દરમિયાન યુવતીએ આ બાબતે યોગ્ય સારવાર પણ કરાવી હતી. તબીબોએ તેમને 05 વર્ષ સુધી દવા ચાલુ રાખવા જણાવ્યું હતું. પરંતુ તેઓને દવા લેવી ન ગમતી હોવાથી એક વર્ષથી દવા લેવાનું બંધ કર્યું હતું.
