Amreli SOGની મોટી સફળતા, 59 કિલોથી વધુ માદક પદાર્થ (કાલા) સાથે એક શખ્સની કરી ધરપકડ

અમરેલી જિલ્લા પોલીસના સ્પેશિયલ ઓપરેશન ગ્રુપે એક મોટી સફળતા મેળવી છે. લાઠી તાલુકાના ભુરખિયા ગામમાંથી પોલીસે એક રહેણાંક મકાન પર દરોડો પાડીને માદક પદાર્થ (કાલા) નો મસમોટો જથ્થો ઝડપી પાડ્યો છે. આ કાર્યવાહીમાં કુલ 59 કિલો અને 800 ગ્રામ સૂકા પોષ ડોડા સાથે એક આરોપીની ધરપકડ કરવામાં આવી છે.

ભુરખીયા ગામે એક રહેણાક મકાન માથી કાલાનો જથ્થો ઝડપાયો.

અમરેલી SOG ટીમને બાતમી મળી હતી કે ભુરખિયા ગામમાં એક રહેણાંક મકાનમાં ગેરકાયદેસર રીતે માદક પદાર્થનો જથ્થો સંગ્રહવામાં આવ્યો છે. આ બાતમીના આધારે SOGની ટીમે તાત્કાલિક દરોડો પાડ્યો હતો. દરોડા દરમિયાન પોલીસે મકાનમાંથી 59 કિલો અને 800 ગ્રામ સૂકા પોષ ડોડા, એક મોબાઈલ ફોન અને વજન કાંટા સહિત કુલ રૂ.1,86,140નો મુદ્દામાલ જપ્ત કર્યો હતો.

આરોપી રાજુભાઇ નકુભાઇ ચાવડાને અમરેલી એસઓજીએ ધરપકડ કરી

પોલીસે આ મામલે મકાન માલિક રાજુભાઈ નકુભાઈ ચાવડાને ઝડપી પાડ્યો છે. આ ઘટનાથી પોલીસ તંત્ર સક્રિય થયું છે અને આ રેકેટમાં અન્ય કોઈ વ્યક્તિઓ સંડોવાયેલા છે કે કેમ તે દિશામાં વધુ તપાસ હાથ ધરવામાં આવી છે. અમરેલી SOG દ્વારા કરવામાં આવેલી આ કામગીરી પ્રશંસનીય છે અને યુવા પેઢીને નશાના દૂષણથી બચાવવા માટે આવા કડક પગલાં અત્યંત આવશ્યક છે.