Amreliના ધારી ગીરમાં મેઘરાજાએ ધમાકેદાર પધરામણી, ધોધમાર વરસાદથી ગોરડિયો નદીમાં આવ્યું ઘોડાપૂર

અમરેલી જિલ્લાના ધારી ગીર પંથકમાં આજે મેઘરાજાએ ધમાકેદાર પધરામણી કરી છે. લાંબા સમયનો વિરામ લીધા બાદ શરૂ થયેલા ધોધમાર વરસાદને કારણે સમગ્ર વિસ્તારમાં નદી-નાળા છલકાઈ ગયા હતા અને ખેડૂતોમાં આનંદનો માહોલ છવાયો હતો. આ વરસાદથી વાતાવરણમાં ઠંડક પ્રસરી ગઈ હતો અને ગરમીથી લોકોને મોટી રાહત મળી હતી. આ ભારે વરસાદને કારણે વિસ્તારની મુખ્ય નદીઓમાં પાણીની આવક વધી છે. ખાસ કરીને ગોરડિયો નદીમાં ઘોડાપૂર આવ્યું છે.

અમરેલીમાં ભારે વરસાદથી નદી-નાળા છલકાયા

નદીમાં પાણીનો પ્રવાહ એટલો તેજ હતો કે રસ્તા પરથી પણ પાણી વહેવા લાગ્યા હતા. જેના કારણે વાહનચાલકોને થોડી મુશ્કેલી પડી હતી. જોકે આ દૃશ્યને માણવા માટે ઘણા લોકો નદી કિનારે પહોંચ્યા હતા. ધારી ગીર વિસ્તારમાં આ વરસાદ પાક માટે અત્યંત ફાયદાકારક સાબિત થશે. ખેડૂતો ઘણા સમયથી વરસાદની રાહ જોઈ રહ્યા હતા અને હવે આ વરસાદથી તેમના પાકને નવજીવન મળ્યું છે.

નદીમાં ઘોડાપૂર આવતા રસ્તા પાણી વહ્યા

આ વરસાદથી કપાસ, મગફળી અને અન્ય પાકોને સારો વિકાસ મળશે તેવી ખેડૂતોમાં આશા બંધાઈ છે. આમ ધારી ગીર પંથકમાં આવેલો આ વરસાદ ખેડૂતો માટે આશીર્વાદરૂપ સાબિત થયો છે. જોકે નદીઓમાં ઘોડાપૂર આવતા તંત્ર દ્વારા લોકોને નદીના પટમાં ન જવા માટે સૂચના આપવામાં આવી છે.