અમરેલી જિલ્લાના વડિયા તાલુકાના તોરી ગામે કપાસની ખરીદીમાં મોટા પાયે ગોલમાલ અને છેતરપિંડી થતી હોવાનો ચોંકાવનારો કિસ્સો સામે આવ્યો છે. આ સમગ્ર ઘટનાનો એક વીડિયો વાયરલ થતાં ખેડૂતો સાથે થતી છેતરપિંડીનો ભાંડો ફૂટ્યો છે. ખેડૂતોએ આક્ષેપ કર્યો છે કે, કપાસની ખરીદી વખતે એક ગાડી દીઠ 15 મણ જેટલો કપાસ વધુ લેવામાં આવતો હતો. આ ગોલમાલ પાછળ દલાલો અને વેપારીઓના મજૂરોની મોટી કરતૂત હોવાનું સામે આવ્યું છે. આ કરતૂતને કારણે ખેડૂતોને તેમના પાકના વજનમાં મોટું નુકસાન સહન કરવું પડતું હતું. સમગ્ર પ્રકરણ સામે આવતા ખેડૂતોમાં ભારે રોષ અને આક્રોશ ફેલાયો છે.
ખાલી ટ્રકનું વધુ વજન દર્શાવવાની કરતૂત
કપાસની ખરીદીમાં છેતરપિંડી કરવાની પદ્ધતિ પણ એવી હતી, જેનાથી ખેડૂતોને સીધું નુકસાન થતું હતું. આ દલાલો અને મજૂરો ખાલી ટ્રકનું વજન (તાર) જાણી જોઈને વધુ દર્શાવતા હતા. એટલે કે, ટ્રકમાં કપાસ ભર્યા બાદ જ્યારે કુલ વજન થતું, ત્યારે તારનું વજન વધુ બાદ થતાં ખેડૂતોના કપાસનું વજન આપોઆપ ઓછું થઈ જતું. ખેડૂતોના આક્ષેપ મુજબ, આ પ્રકારે પ્રત્યેક ફેરામાં 15 મણ કપાસની ચોરી કરવામાં આવતી હતી. આ ગોલમાલનો ભાંડો ફૂટતાં જ ગામના સરપંચ અને જાગૃત ખેડૂતો તાત્કાલિક વેપારી પાસે પહોંચ્યા હતા અને સમગ્ર ઘટના અંગે સખત ખુલાસો માંગ્યો હતો, જેના કારણે વેપારીઓ અને દલાલોની મિલીભગત ખુલ્લી પડી હતી.
