આણંદના ઉમરેઠ નજીક આજે એક ગમખ્વાર માર્ગ અકસ્માતની ઘટનામાં એક યુવકનું કરૂણ મોત નીપજ્યું છે. જ્યારે તેની સાથે સવાર મહિલાને ગંભીર ઇજા પહોંચી છે. આ અકસ્માત ઉમરેઠના લીગડા અને આશીપુરા ગામ વચ્ચેના માર્ગ પર સર્જાયો હતો. લીગડા-આશીપુરા માર્ગ પર એક ફોર વ્હીલર કાર અને બાઇક વચ્ચે ધડાકાભેર ટક્કર થઈ હતી. ટક્કર એટલી જોરદાર હતી કે બાઇક પર સવાર યુવકનું ઘટનાસ્થળે જ કમકમાટીભર્યું મોત નીપજ્યું હતું.
લીગડા આશીપુરા વચ્ચે થયો અકસ્માત
બાઇક પર સવાર મહિલાને ગંભીર ઇજાઓ પહોંચી હતી. અકસ્માત બાદ તરત જ એમ્બ્યુલન્સ મારફતે ઇજાગ્રસ્ત મહિલાને સારવાર અર્થે હોસ્પિટલ ખસેડવામાં આવી હતી. અકસ્માતની તીવ્રતા એટલી હતી કે ફોર વ્હીલર કારના આગળના ભાગને પણ મોટું નુકસાન થયું હતું. ઘટનાની જાણ થતાં જ ઉમરેઠ પોલીસ તાત્કાલિક ઘટનાસ્થળે દોડી આવી હતી. પોલીસે મૃતક યુવકના મૃતદેહને પોસ્ટમોર્ટમ માટે ઉમરેઠની સરકારી હોસ્પિટલમાં ખસેડવાની કાર્યવાહી હાથ ધરી હતી.
