આણંદ જિલ્લામાં કમોસમી વરસાદના કારણે ખેતી પાકોમાં વ્યાપક નુકસાન થયું છે, જિલ્લામાં ડાંગર, શાકભાજી અને તમાકુ સહિતનો પાક પલળી જતા ખેડૂતોને માથે હાથ દઈ રડવાનો વારો આવ્યો છે. 4 મહિનાની મહેનત એક જ દિવસમાં ધોવાઈ જતા ખેડૂતોની આશાઓ પર પાણી ફરી વળ્યું છે.
તમાકુના પાકને મોટું નુકસાન પહોંચ્યું
આણંદ જિલ્લામાં છેલ્લા બે દિવસથી કમોસમી વરસાદ વરસી રહ્યો છે. કમોસમી વરસાદના કારણે ખેતરોમાં તૈયાર થયેલા ખેતી પાકોને વ્યાપક નુકસાન પહોંચ્યું છે. જિલ્લામાં 60,000 હેકટરથી વધારે ડાંગરનો પાક કરવામાં આવ્યો હતો, જેમાં મોટાભાગની ડાંગર તૈયાર થઈ ગઈ હતી, ત્યારે જ આવેલા કમોસમી વરસાદે ખેતી પાકોને નષ્ટ કરી દીધા છે. ડાંગરની સાથે સાથે આણંદ જિલ્લાના મહી ભાઠા વિસ્તારમાં કરવામાં આવતા તમાકુના પાકને વ્યાપક નુકસાન પહોંચ્યું છે. બોરસદ તાલુકાના મહી નદી કિનારે ભાઠા વિસ્તારમાં તમાકુનો પાક કરવામાં આવે છે. જે એક નંબરની તમાકુ હોય છે અને તેનો ભાવ સૌથી વધુ આવતો હોય છે.
