આણંદ જિલ્લામાં આજે આશા વર્કર બહેનોએ પોતાની પડતર માંગણીઓને લઈને કલેક્ટર કચેરી ખાતે અનોખો વિરોધ પ્રદર્શિત કર્યો હતો. મોટી સંખ્યામાં એકઠી થયેલી આશાવર્કર બહેનોએ કલેક્ટર કચેરીમાં રામધૂન બોલાવીને સરકાર અને તંત્રનું ધ્યાન દોરવાનો પ્રયાસ કર્યો હતો. આ આંદોલનનો મુખ્ય હેતુ તેમની લાંબા સમયથી ચાલી આવતી માંગણીઓ પર ધ્યાન ખેંચવાનો હતો. આશાવર્કર બહેનોએ ટેકોની કામગીરી માટે મોબાઇલ સુવિધા આપવાની માંગ કરી છે.
કલેક્ટર કચેરીમાં બોલાવી રામધૂન
તેમના કહેવા મુજબ, આધુનિક સમયમાં કામગીરી સરળ બનાવવા માટે ટેકનોલોજીનો ઉપયોગ અનિવાર્ય છે અને તેના માટે જરૂરી સાધનો પૂરા પાડવા જોઈએ. આ ઉપરાંત તેમની મુખ્ય અને સૌથી મોટી માંગણી સમાન કામ, સમાન વેતનની છે. આશાવર્કરોનું કહેવું છે કે તેઓ સમાન કામગીરી કરે છે. પરંતુ તેમને તેના પ્રમાણમાં યોગ્ય મહેનતાણું મળતું નથી. તેમણે સરકાર પાસે તેમના કામનું યોગ્ય મૂલ્યાંકન કરીને યોગ્ય વેતન આપવાની માંગ કરી છે.
