બનાસકાંઠા જિલ્લામાં તાજેતરમાં ભારે વરસાદ અને પૂર જેવી સ્થિતિને કારણે અનેક ગામડાઓમાં વીજ પુરવઠો ખોરવાઈ ગયો હતો, જેના કારણે હજારો પરિવારોને મુશ્કેલીનો સામનો કરવો પડ્યો હતો. પરંતુ, ઉત્તર ગુજરાત વીજ કંપની લિમિટેડ (UGVCL)ની ટીમોએ યુદ્ધના ધોરણે કામગીરી કરીને આ સમસ્યાનું નિવારણ લાવ્યું છે. UGVCL ની ટીમોએ દિવસ-રાત મહેનત કરીને કુલ 294 ગામોમાં વીજ પુરવઠો ફરીથી શરૂ કરી દીધો છે. આ સઘન કામગીરીના પરિણામે, બનાસકાંઠાના પૂરગ્રસ્ત વિસ્તારોમાં ફરી એકવાર રોશની અને રાહતનો માહોલ છવાયો છે.
નડાબેટ ઝીરો બોર્ડર સુધી વીજળી પહોંચાડવાની કામગીરી
પૂરના પાણી ઓસર્યા બાદ વીજ કંપની સામે સૌથી મોટો પડકાર વીજ પોલ, તાર અને અન્ય ઇન્ફ્રાસ્ટ્રક્ચરને થયેલા નુકસાનનું સમારકામ કરવાનો હતો. UGVCL ના કર્મચારીઓએ કપરી પરિસ્થિતિમાં પણ કામ કરીને ન માત્ર જિલ્લાના મુખ્ય ગામો, પરંતુ ભારત-પાકિસ્તાન સરહદ પર આવેલા નડાબેટ ઝીરો બોર્ડર સુધી પણ વીજ પુરવઠો પૂર્વવત કરી દીધો છે. આ કામગીરી દર્શાવે છે કે વીજ કંપનીના કર્મચારીઓએ માત્ર ગ્રાહકોની સુવિધા જ નહીં, પરંતુ રાષ્ટ્રીય સુરક્ષા માટે પણ તેમની જવાબદારી નિભાવી છે. આ સરાહનીય પ્રયાસથી સ્થાનિક લોકોમાં ભારે રાહત જોવા મળી છે.
