ભરૂચ જિલ્લાના અંકલેશ્વર શહેરના મીરાનગર વિસ્તારમાં ગણેશ ઉત્સવ દરમિયાન એક અણછાજતી ઘટના સામે આવી છે, જેના કારણે ભારે વિવાદ સર્જાયો છે. ગણેશ પંડાલમાં સ્થાપિત ભગવાન ગણેશની મૂર્તિની હાજરીમાં જ કેટલીક ડાન્સરો દ્વારા ફિલ્મી ગીતો પર અશ્લિલ ડાન્સ કરવામાં આવ્યો હતો. આ ડાન્સ જોઈને ત્યાં હાજર ભક્તોની ધાર્મિક લાગણી દુભાઈ છે. આ ઘટનાનો વીડિયો સોશિયલ મીડિયા પર વાયરલ થતાં સમગ્ર ભરૂચ જિલ્લામાં લોકોમાં આક્રોશ ફેલાયો છે.
ભક્તિના માહોલમાં અશ્લીલતાનો પ્રવેશ
સામાન્ય રીતે ગણેશ ઉત્સવનું આયોજન ભક્તિમય વાતાવરણમાં થાય છે, જ્યાં ભજન, કીર્તન અને ધાર્મિક કાર્યક્રમો યોજાય છે. પરંતુ, મીરાનગરના પંડાલમાં થયેલી આ ઘટનાથી પવિત્ર પર્વની ગરિમાને ઠેસ પહોંચી છે. વાયરલ થયેલા વીડિયોમાં સ્પષ્ટ જોઈ શકાય છે કે, ડાન્સરો અશ્લિલ રીતે ડાન્સ કરી રહી છે અને કેટલાક યુવકો તેમના પર પૈસા પણ ઉડાડી રહ્યા છે. આ દૃશ્યો ગણેશ ભક્તો માટે અત્યંત દુઃખદ અને અપમાનજનક છે.
