ભાવનગર જિલ્લાના મહુવા તાલુકાના મોણપર ગામે નજીવી બાબત પરથી બે સ્થાનિક પરિવારો વચ્ચે ઉગ્ર મારામારી થવાનો બનાવ સામે આવ્યો છે. આ હિંસક અથડામણનો વીડિયો સોશિયલ મીડિયામાં વાયરલ થતાં સમગ્ર વિસ્તારમાં ચકચાર મચી ગઈ છે. આ ઘટના લગભગ ત્રણ દિવસ પહેલાં મોણપર ગામે બની હતી. મારામારીનું મૂળ કારણ રસ્તા ઉપરથી પસાર થવા અથવા ન ચાલવા જેવી સામાન્ય બાબત હતી. રસ્તાના ઉપયોગને લઈને શરૂ થયેલી બોલાચાલીએ ટૂંક સમયમાં જ ઉગ્ર સ્વરૂપ ધારણ કર્યું અને બે પરિવારો વચ્ચે ધીંગાણું ખેલાયું હતું.
મોણપર ગામે રસ્તા ઉપર ન ચાલવા મુદ્દે મારામારી
મારામારીમાં બંને પરિવારોના કુલ 4 વ્યક્તિઓને ઈજાઓ પહોંચી હતી. ઈજાગ્રસ્તોમાં એક મહિલા સહિત બે વ્યક્તિઓ ને પગ અને માથાના ભાગે ગંભીર ઈજાઓ પહોંચી હતી. ઈજાગ્રસ્તોને તાત્કાલિક પ્રથમ સારવાર માટે બગદાણા હોસ્પિટલ ખાતે ખસેડવામાં આવ્યા હતા. ત્યારબાદ, વધુ ગંભીર ઈજાઓને કારણે તેમને મહુવા હોસ્પિટલ ખાતે વધુ સારવાર માટે ખસેડવામાં આવ્યા છે. આ ઘટના મામલે હુમલાનો ભોગ બનેલા પક્ષ દ્વારા બગદાણા પોલીસ સ્ટેશનમાં ચાર શખ્સો વિરુદ્ધ ફરિયાદ નોંધાવવામાં આવી છે.
