Bhavnagarના મહુવાની પારેખ કોલેજમાં શિક્ષકોની અછત સામે વિદ્યાર્થીઓ અને ABVP દ્વારા વિરોધ પ્રદર્શન

ભાવનગર જિલ્લાના મહુવા ખાતે આવેલી પારેખ કોલેજમાં શિક્ષકોની અછત અને અનિયમિત શિક્ષણના મુદ્દે વિદ્યાર્થીઓએ ભારે વિરોધ પ્રદર્શન કર્યું હતું. અખિલ ભારતીય વિદ્યાર્થી પરિષદના નેતૃત્વ હેઠળ વિદ્યાર્થીઓએ કોલેજમાં રામધૂન બોલાવીને પોતાનો અવાજ ઉઠાવ્યો હતો. વિદ્યાર્થીઓનો મુખ્ય આક્ષેપ હતો કે કોલેજમાં શિક્ષકોની પૂરતી સંખ્યા ન હોવાને કારણે તેમના લેક્ચર અનિયમિત ચાલી રહ્યા હતા. ઘણા લેક્ચરો ખાલી જાય છે અને શિક્ષકો સમયસર ક્લાસમાં આવતા નથી. આ પરિસ્થિતિના કારણે વિદ્યાર્થીઓના ભણતર પર ગંભીર અસર પડી રહી હતી.

પારેખ કોલેજમાં શિક્ષકોની અછત સામે વિરોધ

પરીક્ષા નજીક હોવા છતાં અભ્યાસક્રમ પૂરો ન થતા વિદ્યાર્થીઓમાં ચિંતાનું વાતાવરણ છવાયું હતું. આ મુદ્દે વિદ્યાર્થીઓ દ્વારા કોલેજ વહીવટી તંત્રને વારંવાર રજૂઆત કરવામાં આવી હતી. જોકે તેમની રજૂઆતો પર કોઈ ધ્યાન આપવામાં ન આવતા આખરે તેમણે વિરોધ પ્રદર્શનનો માર્ગ અપનાવ્યો હતો. વિદ્યાર્થીઓએ જણાવ્યું હતું કે તેમની વાત કોઈ સાંભળતું નથી અને વહીવટી તંત્ર દ્વારા તેમને માત્ર આશ્વાસનો જ આપવામાં આવે છે.

અનિયમિત લેક્ચર ચાલતા હોવાનો ABVPનો આક્ષેપ

ABVPના કાર્યકરોએ જણાવ્યું હતું કે જો ટૂંક સમયમાં આ સમસ્યાનું નિરાકરણ નહીં આવે અને કોલેજમાં શિક્ષકોની નિમણૂક કરવામાં નહીં આવે તો તેઓ વધુ ઉગ્ર આંદોલન કરશે. વિદ્યાર્થીઓના ભાવિ સાથે ચેડા થવા દેવામાં આવશે નહીં. આ વિરોધ પ્રદર્શનથી કોલેજ કેમ્પસમાં થોડા સમય માટે તણાવનો માહોલ સર્જાયો હતો. આશા રાખવામાં આવે છે કે વહીવટી તંત્ર આ મામલે ગંભીરતાથી પગલાં ભરીને વિદ્યાર્થીઓની સમસ્યાનું નિવારણ લાવશે.