કચ્છના સુપ્રસિદ્ધ પ્રવાસી મથક માંડવી બીચ પરથી એક ચોંકાવનારી ઘટના સામે આવી છે.જ્યાં દરિયાના ઘુઘવતા પાણીમાં ન્હાવા પડેલો એક પરપ્રાંતીય યુવક દરિયાના મજબૂત કરંટ અને ઊંચી લહેરોમાં અચાનક તણાવા લાગ્યો હતો.ઘટનાસ્થળે હાજર સ્થાનિક લોકોની સમયસૂચકતા અને બહાદુરીના કારણે એક યુવકનો જીવ બચી ગયો છે અને મોટી દુર્ઘટના ટળી છે.
યુવક દરિયાના પાણીના તણાવમાં આવી ગયો
મળતી વિગતો મુજબ અન્ય રાજ્યોમાંથી કેટલાક પરપ્રાંતીય યુવાનો માંડવીના દરિયાકિનારે પ્રવાસ અર્થે ફરવા માટે આવ્યા હતા.આ દરમિયાન યુવાનો દરિયા કિનારે મસ્તી કરી રહ્યા હતા ત્યારે અચાનક દરિયામાં ઊંચા મોજા ઉછળવાના શરૂ થયા હતા.જોતજોતામાં એક યુવક દરિયાના પાણીના તણાવમાં આવી ગયો હતો અને ઊંડા પાણી તરફ ખેંચાવા લાગ્યો હતો.યુવકને ડૂબતો જોઈને કિનારે ઉભેલા તેના મિત્રોએ બૂમાબૂમ કરી મૂકી હતી.આ કપરી પરિસ્થિતિમાં ત્યાં હાજર સ્થાનિક લોકો અને નાવિકોએ સહેજ પણ સમય ગુમાવ્યા વિના માનવતા મહેકાવી હતી.
