Bhujમાં PM આવાસ યોજનામાં 40 હજારની લાંચ લેતા બે કર્મચારીઓ ઝડપાયા

Bhujમાં PM આવાસ યોજનામાં 40 હજારની લાંચ લેતા બે કર્મચારીઓ ઝડપાયા

ભુજ તાલુકા પંચાયતમાં ચાલતી વહીવટી પારદર્શિતા સામે ગંભીર સવાલો ઉભા થયા છે. તાજેતરમાં પ્રધાનમંત્રી આવાસ યોજનાના લાભાર્થીને સહાયની રકમ મંજૂર કરવાના બહાને રૂપિયા 40,000ની લાંચ માંગનારા બે કર્મચારીઓને ACBએ રંગેહાથ ઝડપી પાડ્યા હતા. આ ઘટનાએ સરકારી કચેરીઓમાં ચાલતા ભ્રષ્ટાચારને ફરી એકવાર ઉજાગર કર્યો હતો.

ACBએ બાતમીના આધારે કાર્યવાહી હાથ ધરી

ACBને ચોક્કસ બાતમી મળી હતી કે ભુજ તાલુકા પંચાયતના બે કર્મચારીઓ PM આવાસ યોજના હેઠળ સહાય મેળવવા માંગતા એક લાભાર્થી પાસેથી નાણાંની માંગણી કરી રહ્યા હતા. આ બે લાંચ માંગતા કર્મચારીઓમાં એક ગ્રામ સેવક અને એક ટેકનિકલ આસિસ્ટન્ટ હતા. આ યોજના હેઠળ ગરીબ અને જરૂરિયાતમંદ પરિવારોને પાકાં મકાનો બનાવવા માટે સરકાર દ્વારા આર્થિક સહાય પૂરી પાડવામાં આવતી હોય છે. જોકે આ કિસ્સામાં લાભાર્થીને તેની સહાય મંજૂર કરવા માટે લાંચ આપવાની ફરજ પડી હતી.

બંને આરોપી કર્મચારીઓની તાત્કાલિક અટકાયત કરવામાં આવી 

ACBની ટીમે બાતમીના આધારે કાર્યવાહી કરતા યોજના મુજબ જે સમયે આરોપી કર્મચારીઓએ લાંચની રકમ સ્વીકારી તે જ સમયે ACBની ટીમે તેમને રંગેહાથ ઝડપી પાડ્યા હતા. બંને આરોપીઓની તાત્કાલિક અટકાયત કરી લેવામાં આવી હતી. ACBએ ઝડપાયેલા કર્મચારીઓ વિરુદ્ધ ભ્રષ્ટાચાર નિવારણ અધિનિયમ હેઠળ ગુનો નોંધી વધુ તપાસ હાથ ધરી હતી.