બોટાદ બાદ હવે ગઢડા એગ્રીકલ્ચર પ્રોડ્યુસ માર્કેટ કમિટી (APMC) પણ વિવાદોના વમળમાં ફસાઈ છે. ગઢડા APMCમાં કપાસની ખરીદીને લઈને 'કડદા' (ખેત પેદાશમાંથી માટી કે કચરાના નામે વજન કાપી લેવો) નું ભૂત ધૂણ્યું હોવાના આક્ષેપો થઈ રહ્યા છે. આ સમગ્ર મામલો ત્યારે પ્રકાશમાં આવ્યો જ્યારે એક ખેડૂત અને વેપારી વચ્ચે કપાસમાં કડદાને લઈને રકઝક થઈ રહી હોવાનો વીડિયો સોશિયલ મીડિયા પર વાયરલ થયો. આ વીડિયોમાં ખેડૂત પોતાની જણસમાં થતા કડદા સામે વિરોધ કરી રહ્યો હોવાનું સ્પષ્ટ દેખાય છે, જે ખેડૂતોમાં ચાલતી અનિયમિતતાની ફરિયાદોને સમર્થન આપે છે.
APMC ચેરમેન દ્વારા આક્ષેપોનો સખત ઇનકાર
વાયરલ વીડિયો બાદ ગઢડા APMCના ચેરમેને તાત્કાલિક દાવો કર્યો છે કે યાર્ડમાં કડદો થતો નથી. તેમણે વિપક્ષ પર રાજકીય પ્રહારો કરતા જણાવ્યું કે, આ વિડીયો કોંગ્રેસ દ્વારા સત્તા મેળવવા માટે હવાતિયાં મારવાનું કાવતરું છે. ચેરમેનનું કહેવું છે કે, આ રીતે યાર્ડને બદનામ કરવામાં આવી રહ્યું છે અને વેપારીઓની સાથે યાર્ડની પ્રતિષ્ઠાને હાનિ પહોંચાડવામાં આવી રહી છે. તેમણે ભારપૂર્વક જણાવ્યું કે ગઢડા APMC ખેડૂતોના હિત માટે કામ કરે છે અને અહીં સંપૂર્ણ પારદર્શિતા જાળવવામાં આવે છે.
