Chhota Udepurની ઉચ્છ નદીમાં આવ્યા ઘોડાપૂર, ડાયવર્ઝન ધોવાતા માર્ગ બંધ

છોટાઉદેપુર જિલ્લાના પાવી જેતપુર તાલુકામાં થયેલા ધોધમાર વરસાદને કારણે ઉચ્છ નદીમાં ઘોડાપૂર આવ્યા છે. નદીમાં નવા નીરની ભારે આવક થતા ઝાબ ગામ નજીક નદી પર બનાવેલું ડાયવર્ઝન ધોવાઈ ગયું છે. જેના કારણે વાહનવ્યવહારને અસર થઈ છે. પાવી જેતપુરના ગ્રામ્ય વિસ્તારોમાં છેલ્લા કેટલાક દિવસોથી સારો વરસાદ પડી રહ્યો છે.

પાવી જેતપુરના ઝાબ ગામે નદીમાં ઘોડાપૂર

આ ભારે વરસાદને કારણે ઉચ્છ નદી બે કાંઠે વહેવા લાગી છે અને તેમાં ઘોડાપૂરની સ્થિતિ સર્જાઈ છે. ઉચ્છ નદી પર ભીંડોલથી ઝાબ ગામ તરફ જતા રસ્તા પર એક ડાયવર્ઝન બનાવવામાં આવ્યું હતું. નદીમાં પાણીનું સ્તર વધતા આ ડાયવર્ઝન સંપૂર્ણપણે ધોવાઈ ગયું છે. જેના કારણે આ માર્ગ પરનો વાહનવ્યવહાર થંભી ગયો છે.

ઉચ્છ નદી પર બનાવેલ ડાયવર્ઝન ધોવાયું

સ્થાનિકોને અવરજવર માટે લાંબા અંતરનો રસ્તો કાપવાની ફરજ પડી રહી છે. આ ઘટનાએ ફરી એકવાર નદીઓ પર યોગ્ય પુલ બનાવવાની જરૂરિયાત પર ભાર મૂક્યો છે. દર વર્ષે ચોમાસા દરમિયાન આવા ડાયવર્ઝન ધોવાઈ જવાના બનાવો બને છે. જેના કારણે લોકોને ભારે હાલાકીનો સામનો કરવો પડે છે.