છોટાઉદેપુર જિલ્લામાં દારૂની હેરાફેરી સામે ગુજરાત સ્ટેટ મોનિટરિંગ સેલ (SMC) દ્વારા મોટી કાર્યવાહી કરવામાં આવી છે. SMCની ટીમે બોડેલી નજીક આવેલા કોલીયારી ગામે દરોડા પાડીને દારૂના એક મોટા રેકેટનો પર્દાફાશ કર્યો છે. આ દરોડા દરમિયાન SMCએ 15 જેટલા આરોપીઓને રંગે હાથે ઝડપી પાડ્યા હતા. આ આરોપીઓ દારૂની હેરાફેરી માટે 15 જેટલા ટૂ-વ્હીલરનો ઉપયોગ કરતા હતા. SMCએ નર્મદા કેનાલ પાસેથી દારૂનો મોટો જથ્થો ઝડપી પાડ્યો હતો, જે મધ્યપ્રદેશની સરહદ નજીકથી ગુજરાતમાં ઘૂસાડવામાં આવી રહ્યો હતો. એક સાથે આટલી મોટી સંખ્યામાં આરોપીઓ અને વાહનો સાથે દારૂનો જથ્થો ઝડપાતા સમગ્ર પંથકમાં ખળભળાટ મચી ગયો છે.
સ્થાનિક પોલીસની કામગીરી પર સવાલો
SMC દ્વારા કરવામાં આવેલી આ મોટી કાર્યવાહી બાદ સ્થાનિક પોલીસની કામગીરી પર ગંભીર સવાલો ઊભા થયા છે. જે વિસ્તારમાં આટલા મોટા પાયે અને આટલી મોટી સંખ્યામાં લોકો દારૂની હેરાફેરીનું કૌભાંડ ચલાવી રહ્યા હોય, ત્યાં સ્થાનિક પોલીસને કેમ જાણ નહોતી? તેવો સવાલ પ્રજામાં અને વહીવટી વર્તુળોમાં ચર્ચાઈ રહ્યો છે. આ દારૂનો જથ્થો મધ્યપ્રદેશની સરહદ નજીકથી લાવીને નર્મદા કેનાલના રસ્તે બોડેલી વિસ્તારમાં ઠાલવવામાં આવી રહ્યો હતો. SMCની સફળ રેડ બાદ સ્પષ્ટ થાય છે કે, સ્થાનિક પોલીસની રહેમનજર કે નિષ્ક્રિયતાને કારણે આ રેકેટ લાંબા સમયથી ચાલી રહ્યું હતું, જે અંગે ઉચ્ચ અધિકારીઓ દ્વારા તપાસ હાથ ધરવામાં આવે તેવી સંભાવના છે.
