અમદાવાદ શહેરના કુબેરનગર વિસ્તારમાં રોડ પર વાહન ઓવરટેક કરવા જેવી નજીવી બાબતમાં શરૂ થયેલી બોલાચાલીએ ઉગ્ર હિંસક સ્વરૂપ ધારણ કર્યું છે.એક્ટિવા ધીમે ચલાવવાનું કહેવા બાબતે થયેલા ઝઘડામાં એક યુવક પર ચાકુ અને દંડા વડે જીવલેણ હુમલો કરવામાં આવ્યો હોવાની ઘટના સામે આવી છે.પોલીસે આ મામલે ક્રોસ ફરિયાદ નોંધીને CCTV ફૂટેજના આધારે હુમલાખોરો વિરૂદ્ધ કાયદેસરની કાર્યવાહી હાથ ધરી છે.
ટુ વ્હીલર ઓવરટેક કરવા બાબતે બોલાચાલી
મળતી માહિતી મુજબ કુબેરનગરમાં રસ્તા પરથી પસાર થઈ રહેલા વાહન ચાલકો વચ્ચે ઓવરટેક કરવા બાબતે અને એક્ટિવા ધીમે ચલાવવા મુદ્દે સામાન્ય બોલાચાલી થઈ હતી.આ સામાન્ય વાતનો ખાર રાખીને મનીષ અને સોનું નામના બે શખ્સોએ અન્ય વાહન ચાલકને રસ્તા પર ધમકાવ્યો હતો. આટલેથી ન અટકતા, બંને શખ્સો પવન નામના વ્યક્તિના ઘરે પણ ધમાલ મચાવવા પહોંચ્યા હતા.પવન ઘરે ન મળતા બંનેએ તેને ફોન પર જાનથી મારી નાખવાની ધમકી આપી હતી.ત્યારબાદ મોડી રાત્રે આદર્શ સ્કૂલના મેદાન પાસે મનીષ અને સોનું ફરીથી પવનને માર મારવાના ઈરાદે પહોંચ્યા હતા.
