અમદાવાદના સોલા વિસ્તારમાં એક અત્યંત કમકમાટીભરી અને શરમજનક ઘટના સામે આવી છે, જેમાં એક પુત્રએ પોતાની જ માતાની હત્યા કરી છે. આ ઘટના પાછળનું કારણ ચોંકાવનારું છે. મળતી માહિતી મુજબ, પુત્રને લગ્ન કરવા હતા, પરંતુ માતા તેના લગ્ન કરાવવા તૈયાર નહોતા. આ મુદ્દે માતા અને પુત્ર વચ્ચે ઉગ્ર બોલાચાલી થઈ હતી, જે બાદ ગુસ્સે ભરાયેલા પુત્રએ માતાને ઢોર માર માર્યો હતો. આ ઘટના બાદ આસપાસના લોકો સ્તબ્ધ થઈ ગયા હતા.
સારવાર દરમિયાન માતાનું કરૂણ મોત
માતાને પુત્રએ માર મારતા તેમને ગંભીર ઇજાઓ પહોંચી હતી. તાત્કાલિક તેમને સારવાર માટે સોલા સિવિલ હોસ્પિટલમાં ખસેડવામાં આવ્યા હતા. જોકે, ગંભીર ઇજાઓના કારણે સારવાર દરમિયાન તેમનું કરૂણ મોત નિપજ્યું હતું. આ ઘટનાએ સમાજમાં માતા-પુત્રના પવિત્ર સંબંધો પર સવાલ ઉભા કર્યા છે. પોલીસે આ ઘટનાની જાણ થતાં જ તાત્કાલિક તપાસ હાથ ધરી હતી અને આરોપી પુત્રને ઝડપી પાડવા માટે કાર્યવાહી હાથ ધરી હતી.
