Ahmedabad : એરપોર્ટ પરથી સોનાની દાણચોરી ઝડપાઈ, 2.5 કરોડનું સોનું પકડાયું

અમદાવાદ એરપોર્ટ પરથી વધુ એક વખત દાણચોરી ઝડપાઈ છે. આંતરરાષ્ટ્રીય એરપોર્ટ પરથી 2.5 કરોડ રૂપિયાના સોનાની દાણચોરી ઝડપાઈ છે. દુબઈથી પેસેન્જરે બેગના મોજામાં સોનું સંતાડ્યું હતું. જો કે ચેકિંગ દરમિયાન આ સોનાની દાણચોરી ઝડપાઈ છે. આરોપીઓ સામે કસ્ટમ વિભાગે કાયદેસરની કાર્યવાહી હાથ ધરી છે.

અમદાવાદ આંતરરાષ્ટ્રીય એરપોર્ટ પર દાણચોરીની ઘટનાઓ વધી

તમને જણાવી દઈએ કે અમદાવાદ આંતરરાષ્ટ્રીય એરપોર્ટ પર દાણચોરીની ઘટનાઓ અવારનવાર સામે આવતી રહે છે. થોડા દિવસ પહેલા 25 ઓગસ્ટે જ એરપોર્ટ પરથી સોનું અને સિગારેટની દાણચોરી ઝડપાઈ હતી. એરપોર્ટના ટોયલેટમાંથી સોનાની પેસ્ટના 2 પાઉચ મળી આવ્યા હતા. આ સોનાની પેસ્ટનું શુદ્ધિકરણ કરતા તેમાંથી 1.93 કરોડનું સોનુ હોવાનું સામે આવ્યું હતું. આ સાથે જ કંબોડિયાથી આવેલા મુસાફર પાસેથી સિગારેટના પેકેટ મળી આવ્યા હતા. બેગમાં રાખવામાં આવેલી 52,400 સિગારેટ સ્ટીક મળી આવતા કસ્ટમ વિભાગે કાર્યવાહી હાથ ધરી હતી.

અગાઉ એરપોર્ટ ઈન્ટેલિજન્સે 750.70 ગ્રામ સોનું જપ્ત કર્યું હતું

9 ઓગસ્ટે દુબઈથી અમદાવાદ આવેલા એક મુસાફર પાસેથી એરપોર્ટ ઈન્ટેલિજન્સ યુનિટ એટલેકે AIUએ 750.70 ગ્રામ સોનું જપ્ત કર્યું હતું. જેની કિંમત અંદાજે રૂપિયા 78 લાખની ગણવામાં આવી હતી. આરોપી મુસાફરે સોનાના બિસ્કિટ છુપાવવા માટે એક અનોખી પદ્ધતિનો ઉપયોગ કર્યો હતો. આ મુસાફરે સોનાના બિસ્કિટને તેના મોજામાં છુપાવ્યા હતા. પરંતુ એરપોર્ટ ઈન્ટેલિજન્સ યુનિટની ચાંપતી નજરથી તે બચી શક્યો નહોતો.