Ahmedabadમાં તસ્કરોનો તરખાટ; ઇસ્કોન, બોડકદેવ અને ગોતા વિસ્તારમાં અલગ-અલગ જગ્યાએ ચોરીની ઘટનાઓ

પશ્ચિમ અમદાવાદના પોશ વિસ્તારોમાં તસ્કરો બેફામ બન્યા છે. ઇસ્કોન, બોડકદેવ અને ગોતા વિસ્તારમાં માત્ર એક જ દિવસમાં ચોરી અને સ્નેચિંગની ત્રણ અલગ-અલગ ઘટનાઓ પોલીસ ચોપડે નોંધાઈ છે. જેના કારણે સ્થાનિકોમાં ભયનો માહોલ ફેલાયો છે.

ગોતામાં બંધ મકાનમાંથી લાખોની ચોરી

ગોતા વિસ્તારમાં તસ્કરોએ એક બંધ મકાનને નિશાન બનાવ્યું હતું. તસ્કરોએ મકાનનું તાળું તોડીને અંદરથી રૂ. 7.29 લાખની કિંમતના કિંમતી દાગીના અને રોકડની ચોરી કરીને ફરાર થઈ ગયા હતા. આ બનાવ અંગે સોલા પોલીસ સ્ટેશનમાં ફરિયાદ નોંધાવવામાં આવી છે અને પોલીસે તપાસ હાથ ધરી છે.

ઇસ્કોન બ્રિજ પાસે કારમાંથી ચોરી

ચોરીની બીજી ઘટના શહેરના વ્યસ્ત ઇસ્કોન બ્રિજ નજીક બની હતી. અહીં પાર્ક કરેલી એક કારનો કાચ તોડીને તસ્કરોએ અંદરથી રૂ. 1.66 લાખની કિંમતનો કિંમતી સામાન અને રોકડની ચોરી કરી હતી. આ મામલે સેટેલાઇટ પોલીસ સ્ટેશનમાં ફરિયાદ નોંધવામાં આવી છે. પોલીસે ફરિયાદ બાદ આગળની કાર્યવાહી હાથ ધરી છે.

બોડકદેવમાં ડૉક્ટરના હાથમાંથી મોબાઈલ સ્નેચિંગ

ત્રીજી ઘટનામાં બોડકદેવ વિસ્તારમાં એક ડૉક્ટરના હાથમાંથી મોબાઈલ સ્નેચિંગની ઘટના બની હતી. જેમાં બાઇક પર આવેલા સ્નેચરો ડૉક્ટરના હાથમાંથી કિંમતી મોબાઈલ આંચકીને પૂરપાટ ઝડપે ભાગી છૂટ્યા હતા. આ મામલે વસ્ત્રાપુર પોલીસ સ્ટેશનમાં ફરિયાદ નોંધવામાં આવી છે. પોલીસે ત્રણેય કેસમાં ફરિયાદ નોંધીને સીસીટીવી ફૂટેજના આધારે આરોપીઓને ઝડપી પાડવા માટે તપાસના ચક્રો ગતિમાન કર્યા છે.