Ahmedabad : પ્રજ્ઞાચક્ષુ શિક્ષકે વિદ્યાર્થીનીની સાથે કર્યા શારીરિક અડપલા, પોલીસે લંપટ શિક્ષકની કરી ધરપકડ

શિક્ષકને ગુરુની પદવી આપવામાં આવી છે. જો કે અમદાવાદ શહેરના રાયખડ વિસ્તારમાં ગુરુ અને શિષ્યના સંબંધને લાંછન લગાવતો કિસ્સો પ્રકાશમાં આવ્યો છે. સંગીતના પ્રજ્ઞાચક્ષુ શિક્ષકે વિદ્યાર્થીની સાથે શારીરિક અડપલા કર્યા છે. એટલું જ નહીં જો કોઈને જાણ કરશે તો માર મારવાની પણ ધમકી આપી હતી.

13 વર્ષીય વિદ્યાર્થીનીની સાથે શારીરિક અડપલા કર્યા

સામાન્ય રીતે શિક્ષકનું કામ સંસ્કારોનું સિંચન કરીને વિદ્યાર્થીઓને ઉજ્જવળ ભવિષ્યની રાહ બતાવવાનું હોય છે. પરંતુ વર્તમાન સમયમાં કેટલાક લંપટ શિક્ષકો વિદ્યાર્થીનું ભવિષ્ય ઉજ્જવળ બનાવવાના બદલે જીવન બરબાદ કરી નાખતી હરકતો કરતા હોય છે. શહેરના રાયખડ વિસ્તારમાં પણ આવો જ એક બનાવ બન્યો છે. રાયખડમાં આવેલી એક શાળામાં સંગીતના પ્રજ્ઞાચક્ષુ શિક્ષકે 13 વર્ષીય વિદ્યાર્થીનીની સાથે શારીરિક અડપલા કર્યા છે. જે અંગેની જાણ વિદ્યાર્થિનીએ તેના માતાને કરતા શિક્ષકની કાળી કરતૂતોનો પર્દાફાશ થયો છે.

તપાસ દરમિયાન પણ અનેક ખુલાસા થાય તેવી શક્યતા

છેલ્લા કેટલાક દિવસથી શાળાથી આવ્યા બાદ વિદ્યાર્થીની ગુમસુમ બેસી રહેતી હતી. જેથી તેની માતાએ આ બાબતે તેને પુછતા તેણે કહ્યું હતું કે રણછોડ રબારી સર છેલ્લા કેટલાક દિવસથી તેને હેરાન પરેશાન કરે છે અને ખરાબ ખરાબ અડપલા પણ કરે છે. રિશેષ દરમિયાન વિદ્યાર્થીનીને બોલાવતા અને તેની સાથે શારીરિક અડપલા કરતા હતા. જો કે શિક્ષકે અન્ય વિદ્યાર્થીનીઓ સાથે પણ અડપલા કર્યા હોવાનો આક્ષેપ કરવામાં આવ્યો છે. આરોપી વિદ્યાર્થીનીને ધમકી આપતો હતો કે જો આ બાબતની જાણ કોઈને કરશે તો તેને મારશે. જે અંગે પરિવારને જાણ થતા પરિવારે પોલીસ ફરિયાદ નોંધાવી હતી. હાલમાં પોલીસે આરોપીની ધરપકડ કરીને વધુ તપાસ શરૂ કરી છે. જો કે તપાસ દરમિયાન પણ અનેક ખુલાસા થાય તેવી શક્યતા છે. સાથે જ અન્ય કોઈ ભોગ બનનાર સામે આવે છે કે કેમ તે અંગે તપાસ શરૂ કરવામાં આવી છે.