અમરેલી પોલીસને એક જૂના કેસમાં મોટી સફળતા મળી છે. અમરેલી તાલુકા પોલીસ સ્ટેશનમાં વર્ષ 2000માં નોંધાયેલા છેતરપિંડી અને વિશ્વાસઘાતના એક ગુનાનો આરોપી 25 વર્ષ બાદ મહારાષ્ટ્રના નાગપુર નજીકથી ઝડપાયો છે. આ આરોપી છેલ્લા અઢી દાયકાથી પોલીસની પકડથી દૂર હતો. આરોપીની ઓળખ મૂળ આણંદના રહેવાસી હરજી ઉર્ફે પંકજ ઉર્ફે ભરત ગંગારામ મિસ્ત્રી તરીકે થઈ છે. 25 વર્ષ પહેલાં તેણે ફરિયાદી માધાભાઈ પાસેથી એક ગાડી લીધી હતી.
વર્ષ 2000ના કેસનો આરોપી 25 વર્ષે ઝડપાયો
પરંતુ તેને પરત કરી ન હતી. આ મામલે અમરેલી તાલુકા પોલીસ સ્ટેશનમાં ગુનો નોંધાયો હતો. પોલીસ તપાસ દરમિયાન તે સમયે ગાડી બિનવારસી હાલતમાં મળી આવી હતી અને તેના મૂળ માલિકને સોંપી દેવામાં આવી હતી. જોકે આરોપી ફરાર હતો. છેલ્લા 25 વર્ષથી આ કેસમાં આરોપીની શોધખોળ ચાલી રહી હતી. અમરેલી એલસીબીની ટીમે આ મામલે સઘન તપાસ હાથ ધરી હતી અને ટેકનિકલ સર્વેલન્સ તથા ગુપ્ત માહિતીના આધારે આરોપીનું લોકેશન ટ્રેસ કર્યું હતું.
